Aizawl: Saihapui Village Level Task Force te’n Covid-19 laka invenna atana duty post atana an hman thin, tun hnaia 1st IR Batallion-ten an luah zui tak Saihapui V-a duty post chu nimin khan Assam lam chuan an tihchhiatsak. Kolasib DC chuan Assam Panchayat leh Saihapui VC te inbe tura tih an nih thu ZALEN hrilh a. Hetih lai hian Lailapur check gate ah Mizoram lut tur lirthei dan an ni bawk a ni.

Zirtawpni khan Assam Police chuan IR Duty te chu an post chhuahsan tur hian an lo hrilh tawh a, chuti chungin IR lam hi nimin thleng khan an la duty a. Nimin chawhma lam khan Assam Police (AP) hian bus trip 3 bakah civil mi eng emaw zat hruaiin helai hmun hi an pan a. Helaia IR duty te hian an silaite pawh an lo kau hman a, Assam lam hian civil mi te hi hmatheh atan an hmang a, hei vang hian IR lam hian tanhmun pawh an siam hleih theih lo thu a hmuna kal chuan ZALEN a hrilh a ni.

Saihapui V Village Council Secretary chuan AP chet danah an khua chu Assam huam chhung a nih miau avangin chet ngaihna a awm loh thu sawiin, “Kan khua hi Mizoram ramri atanga Km 1 vela awm niin Mizo vek kan cheng a. Covid-19 laka kan him theih nan khua atanga km 1 bawr velah duty post kan siam a. VLTF kan duty lai chuan Assam Forest leh police lamte lo kal thin mah se, harsatna kan tawk lo a. Mahse, sum leh pai lamah kan buai a, mihring kan indaih lo bawk si avangin Kolasib DC lamah IR-te hi duty tura ngenin an duty takah chuan Assam lam hian an hrethiam lo a. Mizoram lam tan loh vang ni lovin kan khua hi chu Mizoram chhung a ni lo tih a chiang a. IR-te pawh hi Covid-19 vanga duty anni tih Assam lam hi kan hrilh pawhin an pawm thei lo a, hetianga hian an rawn che ta mai niin kan ngai,” tiin ZALEN a hrilh.

Saihapui V thilthleng vang hian mi thenkhat chuan Lailapur Police checkgate-ah Mizoram lut tur lirthei an dang a, nimin tlai he thu buatsaih lai thleng kha chuan Assam lam pan tur lirthei chu an kaltlangtir a, hetih lai hian Mizoram lut tur erawh an la dang thung.

Saihapui V thilthleng chungchangah hian boruak a muanawm chho zel niin Kolasib DC Dr. H.Lalthlangliana chuan Zalen a hrilh a. “Assam lama an panchayat leh Mizoram lamah Saihapui VC-te inbe turin kan ti a. Tun dinhmunah chuan buaina thlenna hmun Mizoram Police-te duty-naah pawh tumah an awm tawh lo a, boruak chu a ziaawm chho zel turah kan ngai,” a ti. Kolasib DC chuan mi thenkhatten Mizoram lut tur lirthei an dan chhan chu Saihapui V-a IR-ten duty post an siam vang nia an hriat thu a sawi bawk.