ZALEN : 21th July 2023 : Assam Rifles hotute chuan Mizo thalaitte tan hmalakna tur thar an neih thu sawiin medical (NEET) leh JEE (engineering) exam hmachhawn turte tan coaching kalpui an tum thu an sawi.

Major General Vinod Kumar Nambiar, YSM, SM, Inspector General Assam Rifles (East) chuan vawiin khan Headquarters, 23 Sector Assam Rifles, Khatla-ah chanchinbumite kawmin he thu hi a sawi a. "Kan tum dan chuan mi retheite kan bitum a, mi 30 kan thlang anga, AR in centre a hawng anga hemiah hian mithiamte ruaiin anni hian theihtawp an chhuah pui dawn a ni", tiin Nambair chuan a sawi a.

Hetianga hmalak an tum chhan chu Mizo thalaite NEET leh JEE ah inziak tling tam zawk an awm theih an beisei vang niin a sawi bawk.

Heng exam hmachhawn tum te chu AR Centre ah an luh a ngai dawn a, exam hmachhawn tum thlan danah thil ti tak tak mi an duh thu sawiin inenkawlna khauh tak hnuaiah coaching chu pek an tum a. Nakin zelah infiamite tan hetiang ang chi hi kalpui an tum thu AR hotu chuan media mite a hrilh.