September 1, 2022; ZALEN in a chhinchhiah chinah, thla liam ta August thla chhung khan Mizoram ah 'tawhsual tawk a thi' (Sarthi) mi 19 an awm a, chung zinga mi 5 te chu tuitla an ni.

August thla liam ta chhung khan Mizoram hmun hrang hrangah chhiatna thleng a awm nual a, chungah chuan ruahsur vanga chhiatna thleng pawh hmun engemawzatah awmin, vanneihthlak takin ruahsur in chhiatna hrang hrang a thlenah nunna chan an awm lo. 

ZALEN in a chhinchhiah chinah August thla chhung khan lirthei chesual a thi mi 10 an awm a, tuitla hlum mi 5 awm bawkin, ruang chhar 3 leh mi kuttuar a boral pakhat a awm. ZALEN in a chhinchhiah bak tawhsual tawk a thi midang an awm turah ngaih a ni.

August thla chhung a tawhsual tawk a thi mi 19 te hi an vaiin mipa vek an ni a, an zinga mi 2 te chu mipa naupang kum 9 mi leh kum 10 mi an ni. Mipa naupang kum 9 mi chu a patea kut a tawrh vanga thi niin, kutthlaktu a patea chu a tlanbo hnuah man leh a ni tawh a, kum 10 mi chu lirthei chesual a thi a ni.