ZALEN March 18, 2025; Chief minister-in a theih chin chinah austerity measures kalpui an tum tih sawiin, zin veivahna-ah te pawh a zangkhai thei ang berin an kal thin tih a sawi. 

Vawiin (18.3.25) assembly session zawhna leh chhanna hunah member te zawhna te leh zawhbelhna te chhanga he thu hi sawiin, finance minister ni bawk Lalduhoma chuan, year of consolidation leh austerity measures chu unau kalkawp an nih thu a sawi. "Minister te'n an entitled chin an la tawh lo a, MLA te pawhin an entitled chin an la tawh lo, kan intihniam a, official-ah pawh a theih ang ang kan ti a, kan bangla kan enkawlna-ah te, motor chung changah te a inren thei ang berin tunah hian kan kal mek a ni," a ti.

Chief minister chuan bangla kan luah pawhin renovate vak loh tur, bungrua te pawh a thar a thlak kher loh tur, a awmsa rin tur, a hlui tawh a nih chuan Mizo siama thlak tur an tih chu an la kalpui zel dan a nih thu sawi bawkin, hei hi a hlawk hle a an hriat thu a sawi.

"Year of consolidation tak kha a tawp tawh a, chuvang chuan kum kal mek ang em em a inrencham chu kan tum tawh lo a, amaherawhchu austerity measures erawh a theih chin chinah kalpui zel kan tum," a ti bawk.