Nikum maiah khan season tluana ATP Tour-a inlan thei turin Rs. nuai 100 vel a ngaih laiin Sumit Nagal-a chuan Rs. 80,000 vel erh awrh chauh a nei kha a ni a, tunah erawh chuan a thawnthu a dang ta!

India-a mipa maltan tennis player-a ranking sang ber, Nagal-a hian Australian Open first round paltlangin a chhe berah Rs. nuai 98 tal a hum thei dawn a, second round a paltlang leh a nih phei chuan Rs. nuai 140 dawn a ak haw ang.

Kum 26 mi, Nagal-a hian Melbourne-a Grand Slam inelnaah hian Thawhlehni khan World No. 27 Alexander Bublik chu straight set ngatin, 6-4, 6-2, 7-6 (7-5)-in darkar hnih leh minute 38 chhungin a hneh a. Kum 1989 hnua Indian tennis player zinga Grand Slam-a rinkai (seeded) hneh leh thei hmasa ber a ni nghal. 

Kum 1989 khan Ramesh Krishnan chuan khatih laia World No. 1 leh Australian Open champion lai, Mats Wilander chu a lo hneh tawh a, Nagal-a hian a chhunzawm ta chiah a ni.

Tun tuma hnehna a chan hi Nagal-a hian a inkhel ve tawh china hnehna a chan pawimawh ber a tling hial a, harsatna tam tak lo patlang tawhtu a nih avangin phurna petu pawh a nih ngei beisei a ni.

Nikum maiah khan PTI-in an kawmnaah sum lama a harsat tak zet thu leh ATP Tour-a inlan turin kum khatah Rs. nuai 100 vel insen a ngai laiin a sum bawmah Rs 80,000 chauh a neih thu a sawi.

“Ka bank balance ka’n en chuan Euro 900 (Rs 80,000 vel) chauh a awm a. Puihna ka hmu ta hlauh va, Pu Prashant Sutar-a’n MAHA Tennis Foundation kaltlanga min puiin IOCL atangin thla hlawh ka la bawk a; mahse, sponsor-tu lian ka nei chuang lo,” a ti.

PTI-in an kawm hnu lawkah hian beverage company lian, PepsiCo India leh Delhi Lawn Tennis Association (DLTA) chuan an pui zui nghal ta bawk a. Sum lamah a phang ta lo deuh va; mahse, khelmualah harsatna a la tawk zui tho.

Kumin Australian Open-a inlan tur pawh hian wildcard entry pek zingah a tel loh avangin qualifier a khel a, hetah hian vawi thum chakin a tling a, Rs. nuai 65 vel (AUD 120,000) a hlawh tawh.

First round-a Kazakhstan tlangval, Bublik a hneh avang hian Australian $ 1,80,000 (Rs nuai 98 vel) a hlawh dawn chiang tawh a, a vawi khat nan Australian Open second round a luh phah bawk.

World No. 137 Indian tlangval hian a vawi hnih nan Grand Slam second round a khel dawn a, Chinese wildcard Juncheng Shang a hmachhawn dawn a, a chak hlauh chuan Australian $ 2,55,000 (Rs nuai 140 thuak) a hlawh thei dawn a ni.