Aizawl : Association for Voluntary Blood Donation (AVBD) chuan COVID-19 hri leng avanga Mizoramin harsatna nasa tak kan tawh mek laia damlote tana thisen pe tura an sawmna ngai pawimawha kohhran thalai pawl hrang hrang, NSS volunteer te, tlawmngai pawlte leh thahnem taka thisen petu te zawng zawng chungah lawmthu an sawi.

AVBD chuan, "Inkharkhip chhungin thisen tlâkchham awm loin damlote mamawh thisen chu district hrang hrangah pek chhuah theih zel a ni a, AVBD ngenna chhanga thisen petu ten a thlawna thisen pek hi Mizoram pumah April thla chhungin 96% a tling hial a ni," an ti.

AVBD leh blood bank te ruahman anga pawl hrang hrangte ruahman anga lockdown laia May 14, 2020 thlenga Mizorama thisen pek zawng zawng hi unit 1,843 a tling a ni.