Aizawl: Mizoram Pradesh Youth Congress Committee chuan thu chhuah siamin April 26, 2019-a Mizoram Chief Minister leh Mizoram Lokayukta-a J.Lalhmingliana, Wing Commander (Rtd), Principal Consultant, Civil Aviation Wing chungchanga complain an thehlut, tun thleng hmalakna la awm lo chu an hriatthiam theih loh thu an tarlang.

MPYCC thuchhuah chuan, J.Lalhmingliana hian April 9, 2019 khan Helicopter hire-na leh Consultancy Firm pakhat atanga a lak belhkhawm Rs.56,42,720 leh April 10, 2019 a Consultancy firm atanga pawisa a lak Rs. 45,35,300 bakah MLA C.Ngunlianchunga, MLA helicopter charter-na Rs. 120,000 (Cheque No. 435734) te chu a mimal account, ICICI Bank account No. 240701500605-ah a dah lut a, hei hi Rs. 1,02,98,020 lai a tling niin an tarlang.

Helicopter hire-na a enkawltu, Pawan Hans-ah pek tur nia a lan lai leh consultancy firm pawi -sa pawh Civil Aviation Wing-in kawl tur a nih laia hetianga mi mal account-a sawrkar pawisa a lut hi finacial rules kalh a nih avangin corruption dik taka an ngaih thu an tarlang bawk.

J.Lalhmingliana a hna a dah nghehna order, Appointment Order No.D26017/1/105-GAD/PT January 23, 2019 a tih chhuah pawh dikhlel, an ti a. “Civil Aviation Wing hi GAD hnuaia Wing pakhat chauh a ni a, Head of Department chu Secretary, GAD a ni. Hetianga Head of Department anga chhal (declare) a ni hi thil dik lo a ni,” tiin, Finance Department Advice ID No. FIN(E) /096/2018 dated 8th April, 2019 pawisa lovah an puh.

Heng an puhnate avang hian MPYCC chuan Principal Consultant hi a rang thei anga chhui a, corruption case siam sak nghal tur leh a hna atanga ban nghal turin Chief Minister Office leh Mizoram Lokayukta-ah a thehlut tih an tarlang a.

CMO lam chuan hmalakna an nei miah lo tih tarlangin, Lokayuta hi chuan ACB lamah thla khat chhungin preliminary enquiry ti turin a hriattir a; mahse, thla 8 hnuah pawh engmah a la awm lo chu Congress thalai hian an ngaih a that tawh loh thu tarlangin police kut an phuar chu phelh tur leh a rang thei ang bera chingfel turin sawrkar an phut, tiin an thuchhuah hian an sawi.