Kar liam ta khan North East Food Processing Conclave chu Aijal Club ah nghah a ni a, Ministry of Food Processing Industries leh Mizoram sawrkar bul tuma neih a ni a. He hunah hian state pawn atangin mi thiam tam tak an rawn kal a, Mizoram chu food processing lamah a hniam avangin nghawrh taka hmalak a tulzia sawichhuah a ni a, training te pawh a theih ang ang an pe bawk a ni. Mizoram hmasawnna tura hetiang hun hman theih a ni hi a lawmawm hle a, chhunzawm zel atan pawh a tha ang. Mizoram sawrkar chuan Growth Centre Luangmualah a bun tawh a, Food Processing Unit 24 atan hmun a ruahman fel a ni tawh bawk a ni. Ngaihven an tam lo hle a, kawng zawh tur a la thui hle mai. Hetiang lam kaihhnawih Corporation te Sawrkar enkawlnain hun eng emaw chen kalpui a nih hnuin a hlawhchham ti tih a ni ber mai. Sawrkar chuan thla hnih khat kalta khan a enkawl Corporation 3 a titawp a, mi mal kutah pakhat chu dah a ni bawk a. Tihtawp a ngaih chhan hi sawifiah dawn chuan hlam chen a awm a, a tawi zawng chuan a then chu sum indaih loh vanga hmasawn thei lo an ni a, thlai sawngbawla hralhna zawng tura duan Corporation chu hlep siamtu ni lovin phurrit a ni zawk a, tihtawp loh theih loh dinhmun an thleng a, a pawi hle mai. Food processing-in a tum ber chu thil ei theih (sa, thlai, adt) a leituin awlsam taka a siam theih tura sawngbawl a ni ber mai a, a huam zau hle a ni. Awlsam tea siam theih a nih avang hian a hralh pawh a kal phian a; thenkhat chu ei rei hnuah hriselna atan a tha lo thei bawk a, tunlaiah chuan hrisel zawkin an in siam siak mek a. Chutih rualin ram changkangah chuan ‘organic’ ei theih an ching leh tan tawh zawk bawk. Engpawh nise, ‘Food processing-a’ ei tur siamte chu awlsam tea siam theih a nihnain hralh a la ti kal reng tho a ni. Hemi kawnga kan ram hnufual zia hre turin a chhunga cheng mipui ngaihsak a hlawh lo hrim hrim a, khawhawi a zau loa, hlawhtling turin hriatna nei an tam lo bawk a. Ram rethei eng mah ti hlei thei lo anga inngaihna Mizo te hian kan nei emaw ni aw? tih rum rum chang a awm ta fo mai. State pawn atangin sa leh thlai ei tur fun sa a rawn lut a, khawchhak atangin lakluh a awm bawk. Hengte hi a zawrh chhawn chauh ti thei nia kan inngai a nih chuan ‘thil theih’ a nih thu uar taka tihrik a ngai tihna a ni. Kan ram angah chuan agriculture in a huam thlai thar chhuah te hi ram chhung leh ram pawna thawn chhuah turin sawngbawl theihniin a lang a. Sa ei tamna ram a ni bawka tual chhung ‘target’-in sa hrang hrang food processing-in a siam theih a. Tunah hian vawk sa danglam deuha siam kan nei tawh a, a lawm awm rualin ‘market’ a chawm hneh lo hle a; a tithar duh tan pawh hmun ruak a la awm niin a lang. Awlsam tea siam mai turin thlai thenkhatte pawh tha taka funin zawrh mek an ni a; chutih rualin la thang zel thei a ni a hmabak erawh a la ko hle. ‘Sawrkar hna a vang’ kan tih rual hian tam tak rilruah a ‘sawrkar nge nge’ tih a intuh nghet tawh ema, hmuh loh tur hna beisei tlata hun khawhral thalai zingah an kat nuk a rinawm a ni. Thalai lehkhathiam hna hmulo te hi mithiam kan neihte hmang hian Sawrkar hian tun aia uar hian tan la sela; policy lian atana rintlak a ni. Din chhuahpui theih a nihzia inhrilh hriatah thapui khawh tak tak sela a va duhawm em! Chumi piah lamah hriatna thuk zawk leh kawng dangin pui bawk sela, chu chu tun leh tun maia ramin a mamawh niin a lang hial awm e.