Aizawl : Nimin atang khan Mizoram sawrkar chuan kaldan phung thlakin quarantine centre-a dahluh zawng zawng te chu an ei in leh awm mai bakah an thisen test na man a laksak tan a, chutih rualin ICMR-in test tura a tih bik (ICMR mandated test) te test man leh contact tracing testman erawh a thlawn a la ni zel ang.

Sawrkar hian test tihna man tur hi a tihsan rualin senso zawng zawng erawh an pek a ngai dawn lo a, subsidized rate an pek a ngai tawh ang. Quarantine facilities hnuaia enkawl mek te ei leh in leh awm man hi hun engemawti atanga khan quarantine ten an chawi a, an thisen test man erawh laksak an ni ngai lo a, tunah chuan an ei leh in bakah an thisen test man chu laksak tel an ni tawh ang. PT-PCR test leh TrueNat test man erawh a inang dawn lo. Test man leh an ei leh in man hi pek nghal tur tih a nih rualin pe tlak nghal thei lo te chuan quarantine facilities an chhuahsan hma ngeiin an pe tlak tur a ni thung a, anmahni enkawltur incharge officer hnena pek tur a ni. Heng testing fee-te hi Chief Medical Officer-ten anmahni bial chhung theuhah lo la khawmin sawrkar revenue a chhun luh leh tur a ni.

Sawrkar quarantine centre-a awmte leh DM&R Dept. Office Order - in Catergory B, C, D & E- a a dah te chuan RT-PCR test man atan hian Rs. 2,500 an pek a ngai dawn a, TrueNat khawla test man hi Rs. 1,500 a ni thung ang. Mahni mimala test neih duh hrim hrim tan RT-PCR-a test man hi Rs. 4,500 a ni ang a, TrueNat-a test man chu Rs. 3,000 a ni ang. Mizoram chhuahsan tur, Certificate pek ngai te testna man chu RT-PCR-in Rs. 4,500 a ni anga, TrueNat chuan Rs. 3,000 a ni thung ang. RT-PCR leh TrueNat test-na senso ngai zat (full rate) chu RT-PCR-ah Rs. 5,539/- leh TrueNat-ah Rs. 4,463/- a ni.

Tunah hian Aizawl district bik hian Quarantine Facilities neihna hmun 30 a awm a, hman mek erawh 21 niin mi 820 awm theihna a ni a, tunah hian mi 678 an awm mek a ni.