ZALEN June 16, 2025 : Vawiin khan I&PR Auditorium, Aizawl-ah khawvel pum huap Awmpuite Ni (International Domestic Workers Day) chu Centre for Development Initiative (CDI) buatsaihin hman a ni a, he hun hi Mizoram State Commission for Women Chairperson C. Zodinpuii'n a hmanpui.

Khuallian C. Zodinpuii chuan kalkhawmte chu fuihna thu hrilhin, "Mihring tu pawh hi bikna nei vek kan ni a, mi tupawh kan inzahtawn thiam tur a ni, domestic worker nih vangin in indah hniam loh tur a ni. In tello hian chhungkaw tam tak an awm thei lo a, chuvangin in dah hniam loh tur a ni," a ti.

Mizoram State Commission for Women Chairperson, "In hna hi hna zahawm tak a ni a, hlawh te tam lo mah se, zahawmna leh dikna in nei a ni tih hriat reng tur. In awmnaah harsatna hrang hrang in tawk thei a, hmuhsitna tawngkam leh tawng dengkhawng tak tak te, hursualna lam hawi lama thlemna leh intihluihna thil te pawh thleng thei a ni. Hlawh inpek that duh loh te pawh awm thei a ni a, heng harsatna in tawh chuan in tan Mizoram State Commission for Women kan awm reng a ni," a ti bawk.

Tunah hian Centre for Development Initiative (CDI) hnuaiah hian domestic worker mi 1,400 vel inziaklut an awm mek a, vawiina he day puala thupui chu 'Recognizing Care, Advancing Dignity and Right for the Domestic Workers' tih hman a ni a, he hunah hian Prof. Lalhriatpuii, Dept of Economics, MZU chuan zirtirna a pe bawk a ni.