ZALEN August 11, 2023: ZPM Political Training-a hun hmangtu, Dr. Vanlalthlana, MLA, Aizawl North - II chuan, “Corruption do turin kan inpeih tawh a, a ngaihna pawh hre turah kan indah a, awmze nei zawka kan kal a ngai. Chutiang tur chuan ruahmanna fel tak kan nei tawh,” a ti. 

Dr. Vanlalthlana chuan, “Ram hmasawnna innghahna bulpui ber chu Sawrkar inrelbawlna tha (Good Governance) a ni a. ZPM chuan kalphung thar, mipui sawrkar hnuaiah sawrkar chak leh huapzo siam kan tum a, tuna kan kal mek dan aia mumal leh awmze nei zawka kan kal a ngai a ni. Chutiang tur chuan ruahmanna fel tak kan nei tawh a ni,” a ti.

Aizawl North - II MLA chuan, “Tuna kan sawrkar inrelbawl dan hi a solid tawk lova, Sectorization kalpuiin, hmasawnna a tak taka kalpui a nih theih nan Sawrkar department inhnaih zualte Minister pakhat hnuaiah dah a ni ang a. Department inhnaih zual (Allied department) te pawh zirchiana, a theih anga pawhkhawm dan kan zawn a ngai a ni. Mizorama sawrkar department 50 dawn thaw kan nei mek a, an inkarah thawh hona tha (Coordination) a awm theih nan leh awmze nei zawk a hmalak nan Convergence Policy hman a ni ang,” a ti bawk. 

Dr. Vanlalthlana chuan, “Sawrkar offce-a thawkte tan leh a dawrtu mipuite tana a awlsam zawk nan sawrkar office hrang hrangte hmun khata dahkhawm (cluster approach management system) kalpui a ni ang a, chutiang atan chuan sawrkar hmun pawimawh dahkhawmna MINECO kan nei sa a, hetah hian Chief Minister Office pawh sawn luh a ni ang. Chutiang zelin District hrang hrang bakah Block level thlengin ruahmanna siam a ni,” a ti a.  

Village Development Committee, Block Development Block, District Development Comtt leh Town Development Committee din a nih chhoh dan tur ruahmanna chiang taka tarlangin, “Development Committee ruangam chu Aizawl North II bialah hmuh theihin a awm,” a ti bawk. 

Dr. Vanlalthlana chuan, “Hetianga system felfai leh inrelbawlna awmze neia kan kal chuan, tuna kan buaina tam tak hi nasa takin kan tireh thei dawn a, eirukna theihna remchang tam tak tihbo a ni a, corruption hi nasa takin kan veng thei dawn a ni. ZPM hi Corruption do turin kan inpeih a, a ngaihna pawh hre turah kan inngai a ni,” a ti bawk.