Aizawl: BJP Mizoram Pradesh hruaitute chuan New Delhi to Bairabi inkarah khualzin phur rel thar a service dawn niin an sawi a, hetih lai hian Transport department lam erawh chuan eng mah an la hre lo thung.

BJP Mizoram hruaitute chuan khualzin phur rel hi September ni 20,2019 atangin a tlan tan dawn niin an sawi a, ruahman dan chuan rel hmingah hian 'Mizo Express' tih phuah a ni dawn a, kar khatah vawi 1 a tlan dawn niin an sawi.

Transport department hnuaia Railway Out Agency te chuan rel thar tlan tur chung changah engmah an la hriat loh thu Zalen an hrilh a. "Rel ah hian a tlan hma ni 120 atangin ticket hi lak lawk theih a ni a, mahse keini chuan rel thar tlan tura sawi hi kan la hre miah lo a ni," an ti.