Aizawl: Bangalore a cham mek Mizoram chanchinbu mi 8 leh IPR official 3 te chuan Ningani khan khawpui thli an sawngbawl dan leh an thlifimna hmun te an tlawh.

Press team te hian Bangalore khawpui tuichhe paihna leh an hman tangkai dan an zir chiang a. Bangalore Water Supply and Sewarage Board (BWSSB) Executive Engineer Rahul Priya Darshini in a kaihruai a, Bangalore khawpuia chhungkaw tin tui thli an lakkhawm dan leh an tih thianghlim dan sawifiahin heng tui an tih thianghlim te hi khawpui chhunga park leh hmun hrang hranga thlai chawm nan leh dil leh lirthei bakah Governor chenna te, an state Legislative Assembly 'Vidhan Soubha' ah leh airport ah te bakah thil dang dang sil nan an hmang tih an sawi. Er. Rahul-a chuan, "Chhungkaw tin thli an tih thianghlima an hman leh hian Bangalore a mipui nuai 4 chuang zet tui thianghlim intur kan hum theih phah a, tui bawlhhlawh tih thianghlim nan hian litre 1000 zelah cheng 10 atanga 12 chauh kan insengso a, nitin tui litre maktaduai 4 hman theih turin kan siam chhuak thin," a ti.

He khawpui thli lakkhawmna ah hian Bangalore a chhungkaw tin ten Sewarage Board pipe zamsa an zawm ngei ngei a ngaih bakah thla tin pawisa an chawi bawk a, hei hian khawpui thli tih thianghlimna senso a phuhru thei nghal bawk. Mizoramah pawh ruahmanna fel zawk nen awlsam taka hetiang hmalakna hi siam theih nia an hriat thu BWSSB thawktu te hian an sawi a. Press team te hian BWSSB Chairman Tusar Giri Nath IAS an hmu nghal a, ani pawhin thurawn tha tak tak MJA te hi a pe a ni.

BWSSB thawktu te hian Press mite hi ni khata tui litre maktaduai 150 (150 mld) sawngbawlna hmun siam mek an tlawhpui bawk a. He project hi vaibelchhe 400 senga siam niin kumin chhung hian hman theiha peih tum a ni a, he project hian Bangalore khawpui thli 40% a sawngbawl thei dawn a ni. Press mite zawhna an chhannaah, treatment plant a tuichhia an sawngbawl chu in atan pawh a iaiawm loh a, mahse in atan chuan an hmang lo mai tih an sawi a. Bangalore ah chuan ruahtui khawl (rain water harvesting) chu In tinin an tih ngei a ngaih thu an sawi bawk.