Aizawl: Zo Re-Unification Organisation (ZORO) General Headquarters, Aizawl hruaitute chuan, Bangladesh-a Zohnahthlak unaute dinhmun derthawng takah an ding mek tih sawiin, mi tam tak an khuaa an awm ngam tawh loh avangin Mizoram a lo raltlan mai thei dinhmunah an ding tih an sawi. 

Nimin khan an office, Treasury square ah thuthar thehdarhtute kawmin, ZORO Vice President Lalmuanpuia Punte chuan, Bangladesh a Zohnahthlak ten an sahim nan leh anmahni pualin state an demand a, Kuki-Chin National Army (KNA) dinin an theih tawkin an bei tih a sawi a, an tribal puite lakah pawh dodalna nasa tak an tawk niin a sawi.

ZORO vice president sawi danin, tun hnai maiah Bangladesh sawrkar sipai ten amahnia an beih ngam loh avangin Arakan Army (AA) te nen inremna siamin, Bangladesh Army te tangrualin KNA te chu Chaihkhiang khua leh a chhehvelah kapin nasa takin an inbei a, Civilian pawi sawi lote pawh dim lovin nunaute an nghaisa a. Hemi vang hian Bangladesh a Zohnahthlak te chuan harsatna nasa tawkin, an tlandarh mek a ni.

Lalmuanpuia Punte chuan, Mizoram sawrkar chu Zohnahthlak te harsatna a theih ang anga ngaihtuah a, hma la turin an ngen tih sawiin, "Kan NGO pui pawl hrang hrang te pawh bengchhi a, a theihna apianga lo tanpui turin kan ngen a, tawngtaipui turin kan in sawm a ni," a ti bawk.