Aizawl: Chittagong Hill Tracks a Kuki Chin National Army ten thuneihna sang zawk an ngiat vanga buaina thleng vanga Bangladesh atanga an sahimna zawnga Lawngtlai District chhunga tlanlut chu mi 372 an tling tawh.

November 20, 2022 khan Bangladesh atanga raltlan mi 274 te chuan Parva-III an thleng a, hemi hnu hian tum 4 rawn luh belh leh in, Ningani kalta khan mi 45 rawn lut lehin kumin 2023 chhungin mi 62 an rawn luhbelh tawh tih Border Security Force hotute chuan an sawi.

Heng raltlan te hi nikum December thla khan Lawngtlai District chhung, Vathuampui, Chamdur Project leh Mautlang ah te engemawzat sawn an ni a, tun dinhmun ah Parva-III bikah Raltlan 212 an awmmek.

Raltlante hi a tlangpuiin, nu nau leh kum lama upa deuh tawh te an ni deuh vek a, sawrkar chuan a theih ang angin chhawmdawl hna an thawk reng a, tlawmngai pawl leh an belh khua ten chhawmdawl hna hi kawng hrang hrangin an thawk reng bawk niin Lawngtlai atanga chhuak nitin chanchinbu The Lawngtlai Post thawktute chuan an sawi.