November 21, 2022; Bangladesh Chittagong Hill Tracks a Bangladesh Sipai leh  Kuki-Chin National Army te inbeihna vanga an sahimna zawnga Lawngtlai District a tlanlut chu mi 272 an tling tawh a, chung mite chu Zohnahthlak vek an ni. 

ZALEN thudawn danin raltlante hian November ni 16, 2022 khan Bangladesh chhung Chaihkhiang khua atangin ramhnuai kawngah Mizoram an rawn pan a, an vaiin mi 2000 chuang an tling. Mizoram a rawn lut mek raltlante hi Sunsawng, Thingdawlte, Salopui khua te an ni a, heng khua a cheng te hian Chaihkhiang khua an pan khawm a, Zohnahthlak hnam peng hrang hrang Bawm, Maria, Khumi, Khiang, Lushai, Pang hnam te an ni.

Hemi chungchangah hian Mizo Students Union (MSU) chuan thuchhuah siamin, Zohnahthlak unau Bangladesh a cheng mek, sahimna zawng a Mizoram a rawn luh tumte Border Security Force (BSF) ten an manganna hriatthiampui lo in, nunau leh kum upa zawkte pawh thliar loin an lo dang vek tih tarlangin, an dem hle tih an tarlang a, "Kan unau buaina tawk mek te'n Mizoram chhungah a rang thei ang ber a inhumhimna an hmuh vat theih nan eng Paramilitary Force mahin harsatna lo siamsak lo turin MSU chuan a ngen," an ti a. An himna ngaihtuahsak thuai tur leh an harsatna a rang thei ang ber a chinfel a nih theih nana hma la turin Mizoram sawrkar an phut tih an tarlang bawk.

Nimin khan heng hmeichhia, nunau leh kum upa lam deuh tawh te hian Lawngtlai District chhung Parva piah Sameinasora an thleng a, ramria duty Border Security Force ten tihtur pawimawh leh chhinchhiah ngaite an tihfel hnu ah Sameinasora ah hruailuh niin, nizan khan Biakin leh Primary School ah riahtir an ni. The Lawngtlai Post Editor Lalngheta Ralte hnen atanga ZALEN thudawn danin, BSF te hian heng raltlante hi hmundang pan an remtih loh vangin Sameinasora ah hian dahkhawm an ni.

Lawngtlai DC Amol Srivastava  ruahmanna in Chawngte SDO(C) in khawtlang hruaitute nen inberawnin an riahna tur leh ei leh in leh mamawh dangte an ngaihtuah a, dan leh thupek lekkawhtute pawh SDPO Chawngte hovin helai hmun hi an thutchilh mek bawk.