Rim takin an thawk a, tihchhuah hlan pawh an nghakhleh tawh hle - chutih lai mek chuan tihchhuah a nih loh tur thu an hre zet chuan a tihrilhhai kher mai. 'Batgirl' director Adil El Arbi leh Bilall Fallah te chuan, "Min thawng tak zet a, tun thleng hian awih harsa kan la ti," tiin an sawi. 

Warner Bros chuan August 2 khan thuchhuah siamin, 'Batgirl' movie chu release a nih loh tur thu an puang. Hei hian film industry a dengchhuak nghal a, a mak tih mai bak sawi tur an hre hlawh lo. A mak ve bawk a ni - release nan thla tam a awm tawh lo a, an peih fel tep tawh tihah an tihchhuah loh tur thu an puan hnan! 

Belgian film director lar Adil El Arbi leh Bilall Fallah te hi Morocco-ah an awm a, heta tang hian hanchin an hria. El Arbi hian nupui a nei a, Will Smith chu guest of honour atan a sawm nghe nghe. "Kan hrilhhai tak zet a, awih harsa kan ti khawp mai," tiin, Adil El Arbi leh Bilall Fallah te hian Instagram-ah an tarlang a ni.  

'Batgirl' ah hian Leslie Grace leh Michael Keaton te an changdun a, J. K. Simmons, Jacob Scipio leh Brendan Fraser te an inlan bawk. Kum 27 mi American actress Leslie Grace pawhin a thu hriat chuan a thawng tak zet tih a sawi a, nghakhleh taka lo thlirtute hnenah an hriatthiamna a ngen bawk. 

Warner Bros ten 'Batgirl' an cancel chhan hi chiang taka tarlan ni lo mah se, The New York Post chuan test screening-a an chhan that loh vang a nih thu an tarlang. Hetih lai hian Warner Bros Chief executive David Zaslav DC superhero movie lamah an insawrbing tur thu a puang a, Marvel hlawhtlinna hnung zui ve an tum a nih hmel hle.