ZALEN April 16, 2026 : Centre for Environment and Social Justice (CESJ) huaihawtin vawiin khan Quarter Guard kawtah environment humhalh ngai pawimawh engemaw zat an pungkhawm. An zinga thusawitu pakhat chuan Bazar Bungkawn leh Treasury Square inkar kawng zauh a tulna chhan a hriat loh thu a sawi.

He huna thusawitu pakhat Aizawl Traffic SP hlui, Lalbiakzama, MPS (Rtd.) chuan Aizawl khawpui lirthei chet dan chu hun rei tak a lo enkawl tawh avangin a hriat chian thu a sawi a, AR chhuahsan ram behchhana Bazar Bungkawn leh Dak Inpui inkar kawng zauh tum chuan awmzia a neih a rin loh thu hi a lo sawifo tawh thin a nih thu a sawi a, Bazar Bungkawn junction bawr traffic system erawh zirchian ngai tak a ni, a ti. Saron Veng atanga Treasury Square panna kawng siam pawh buaina tih belhchhahna tur nia a ngaih thu a sawi bawk.

Pungkhawma thusawitute chuan sawrkar hmalakna do ngawr ngawr an nih loh thu leh thing kih a nih danah an lawm loh avanga hetianga pungkhawm hi huaihawt an nih thu an sawi a, AR chhuahsan rama thing te chu kum 100 chuang te an ni tawh a, boruak tha pekchhuah kawngah an thawhhlawk em em a, khawpui boruak chhe zel vengtu a nih avangin kih an remtih loh thu an sawi a, kih belh a nih tawh loh nan a tawp thleng tan an tum a, a tul chuan zan lamah pawh duty an tum.

Kalkhawm zinga pakhat chuan, Vanapa Hall kawt chhaka Eucalyptus upa tawh tak an kih chuan a hnuk a tih ulh thu ZALEN a hrilh a, thing upa tawh nei leh tur hi chuan kum tam tak a ngaih avangin a uiawm thu a sawi. Humhalh tur zinga tel quarter guard hmaa Kuhva kung leh a bula Far thing te an kit tel chu mak a tih thu a sawi bawk.