Aizawl : Zirtawpni khan Commerce & Industry Department, Govt. Of Mizoram leh Aizawl Bazar puia chawhmeh zuar inhlawmkhawm pawl hrang hrang Association 21 chuan Zirtawpni, May 29, 2020 khan ineremna an ziak a, Bazarpuia in zuar thin te hi an inzawrh a rem lo nghal dawn a, a tam ber te hi Circuit House hnuai, Khatla-a hmun an saka in-zuar tura tih an ni a, Readymade zuar leh second hand zuar te chu Bawng-kawn bazar leh AMC building, Bawngkawn bel tura tih an ni a, June 10, 2020 hmaa inthiar-chhuak fel tura tih an ni.

New Market Building Main Building, A-Lane leh H Building te chu thiah a nih dawn avangin, he hmuna thil zuartute awmna tur hmun hrang hrangah ruahman a ni bawk a, insawnchhuak tur te hi an pan lam tur pawh ngaihtuah sak an ni.

Bazar-a inzuar te insawnchhuah dan tur hi Commerce & Industry leh Dawrpui Local Council te chuan an enfiah anga a, an inthiarchhuah dan tur an rel ang. Aizawl Municipal Corporation (AMC) Building, Bawngkawn bik hi Seconhand zuarte awmna tur atana ruahman a ni a, amaherawhchu, la peih fel chiah loh anih avangin hunrei lo te chhunga peih fel hman tum niin bungruate hi a chunga hun tiam tarlan chhung ngei a senghawi vek tura hriattir an ni. Ruahmanna hi sawrkar lam chuan an siam mai turah bazar-a inzuar te chuan an sawi.

Tum khatah insawn thut theih a nih loh thu pawh an sawi a, inpho turin ruahmanna pawh siam a nih tur thu Thapuii chuan ZALEN a hrilh a, a tul anga kal chu a hun lo la kal turah an tana tha turah an ngai tih sawi a, Bazar-ah hian License nei sa te chu sak zawh hunah an luh leh mai theih thu a sawi bawk. Tuna inremna an ziah ang chuan thlai thar zuar te hi chu kum hnih leh a chanve ang zela thu tur an ni a, bungraw zuar te hi chu kum 4 luah thei tur an ni thung.

Aizawl Bazarpui-ah tunlai hian inpho tam tak an awm a, thil chi hrang hrang zuar an awm a, hemi chungchangah hian helaia licence nei te hruaitu chuan, "Ar nghal vena ven ngai an tam lutuk. I-pho thang hi chu kan inpho ngai meuh lo a, buaipui ngai leh mi dang tana harsatna siam chi kan awm lo. Tuna inpho thin ho zingah hi chuan kan member an awm lo ang," a ti.

Bazarpuia thil zuar thin zingah hian zawrh inang lo an thahnem hle a, association pawh 21 zet an awm a, heng pawl ho te hi an thutna building a zir te, an thutna floor a zir te, an chawhmeh a zir te a pawl hi indin an ni hlawm a, phai lam atanga chawhmeh la thin te pawhin pawl an siam laiin chutiang chawhmeh zuar te chu chawhmeh zuar association-ah an tel ve leh thung. Heng chawhmeh zuar te hian assoctiation lian berah an in-chhal a, member 450 vel bawr an nei.