Aizawl : Aizawl New Market sak that tura dawr nei leh chawhmeh zuarte chuan an awmna bil chu an chhuahsan fel tawh a, chutihlaiin ni tina chawhmeh zuarte chuan helai bawr hi an la kiansan hlei thei lo a, a tul ang angin hmalak lohna chinah bu an la khuar chhunzawm zel a, ni tin Rs. 400 hlawhin hmun remchanga an chawhmeh zawrh atanga an hlepte chu an insem thin a, an awmna tur hmuna an ruat peih fel a la ni lo.

Heng chawhmeh zuarte hi New Market Chawhmeh Zuar Joint Association hnuaia inziak lut niin, anni hi A, B leh C angin an awm thin. An association-ah hian member 469 an awm a, tuna an buaina ber chu an awmna tura sawrkar lamin an buatsaihsak, Circuit House hlui hmun, Khatla-ah hian mi 250 thut theihna chiah a awm.

Chawhmeh zuarte hian hun rei tak atangin chawhmeh lakna an lo nei tawh a, an chawhmeh lakna thinte chu thui takin an kutah an innghat ve tih ZALEN an hrilh a, heng avang hian heng thlai thar an lakna loneitute baka an agent te chu an ngaihchan ve reng an ngai tih an sawi. Heng avanga te hian a rem chan ang anga chawhmeh zawrhna an zawn a ngai tih chu an sawi dan a ni a, rei tak atanga an lo innghahna Bazarpui hmun chu hman loh thei loh niin an sawi.

Lockdown hun rei tak hman a nih hnua Unlock 1 hnuah helai hmun atang hian an inzuar tan a, mumala an inzawrh theih loh avangin, an chawhmeh zawrh atanga an hlepte chu an insem thin.

Chawhmeh lo thleng apiang chu a chah thlengtu in a lo dawngsawng a, hmun an neih loh avangin a chah thleng lo remchang apiangin an zawrhpui zel a, an Sum lu (Capital) an hmuh hnuah a hlawkna chu an association-ah hian an chhung lut zel a, chu hlawkna chu an insem thin a, an hlep atang hian loh chang ni (day) an nei a, mahse, kar tluan chuan hlep nei lo chuan an awm bik ngai lo niin an sawi. An sum bang zawng hi an association hmalakna atan an hmang mai thin a ni.

Zirtawpni khan Chawhmeh zuar te hian Commerce & Industry Director leh Joint Director te pawh hemi chungchang hi an sawi pui a, beiseina sang tak an neih thu ZALEN an hrilh a, Aizawl New Market building hmun thenkhatah beh theih dan awmin an hria a ni.

New Market-a chawhmeh zuar te hi a tul anga Mizo thlai thar zuar turin an in-hawng reng a, a tul anga Commerce & Industry thu chu an ngaihchan thin thu an sawi. Chutihlaiin zawrhna tur rate avangin zuar tura an in-beisei te an zawrh loh chang a awm thin a, an chawhmeh nghah te chu district danga a kal leh chang avanga hamhaih chang an nei niin an sawi. "An hnuaia thu kan ni a, chuvangin an thu anga awm tur kan ni a, ti tura min tih ang chu kan zawm mai tur a ni. Mizo thlai thar zuar tur pawhin kan inpeih vek a, chutiang tur chuan kan inbuatsaih vek a ni," tiin New Market Chawhmeh Zuar Joint Association President Thapuii chuan ZALEN a hrilh.

"Sawrkar zara man man zawka an hralh theih hi chu an lawmpuiawm a, a hlu. Mahse, tam takah hi chuan chawhmeh zuar te tan hi chuan harsatna tam tak a awm a, kan duh ang hian kan awm thei lo. Chutihlaiin an chawhmeh rawn tih thlenna rate thenkhat ang hi chuan zawrh a harsa thin. Aizawla mi rethei te hi chuan kan tuar ve tih erawh hi chu sawrkar lam hian min hriatpui ve se kan duh," a ti bawk.

Chawhmeh zuar te hian Commerce & Industry lamin thingtlam lam an buaipui dan chu lawmawm an tih thu an sawi a, chawhmeh thenkhat office staff te an zawrh zak hial thin avangin an fak a, hetiang hian chhunzawm sak zel thei se an duhpui thu an sawi bawk.

Mizoram sawrkar leh Commerce & Industry hian Mizoram thlai thar, phai lama kan lak ang chi ho lakluh hi a hmun a zirin lakluh phal loh chang a nei a, nimin thleng khan Lakhuihthei leh Zikhlum chu lakluh a khap a, engemaw chen a khap tawh Tomato chu tun hnai mai khan lakluh leh phal a ni tawh.