ZALEN July 16, 2025 : Bazar building sak that meka seat pek leh tura inremna siampui mi 1300 chuangte chungchang chu Commerce & Industries Department Minister Rodingliana Office Chamber-ah Department thuneituten nimin chawhnu khan an ngaihtuah.

Aizawl Bazarpui ti a hriat, Aizawl City Centre leh Aizawl City Centre Annexe Building sak mek dinhmun ennawnin thutkhawm a ni a. Bazar building thiah hmaa seat nei, bazar building sak zawh a nih huna seat pek leh tura inremna a siampui mi 1300 chuangte chungchang ngaihtuahtute chuan heng mite hi endik leh vek tura a ni an ti.

Sawkar dan dinglai angin heng bazar seat-te hi midang kuta hlanchhawn emaw hralhchhawn khap a ni tih tarlan a ni a. A tir a seat pek (original allotee) te ngeiin bazar seat hi an la luah em tih uluk taka endik nise tiin a rel a. E ndikna hi voters ID leh original document hrang hrangte hmanga uluk taka endik tur niin, allotment neitute pawh koh a anmahni finfiahna (interview) neih pui tur a nih thu sawi a ni.

Bazar building pahnih- Aizawl City Centre leh Aizawl City Centre Annexe Building sak mek ah hian tuna ruahman dan chuan dawr 1415 awm thei tura duan a ni a, Ministry hmasa khan bazar building sak zawh a nih huna seat pek leh tura inremna siampui mi 1300 chuang an awm mek thu tarlan a ni.

Industries Minister F.Rodingliana hova thutkhawmna ah hian Bazar seat changtu zinga hralh chhawng emaw inhlanchhawng man chhuah an awm a nih chuan an allotment cancel ni se tia rel a ni a. Dawr luahman ennawn bakah dawr luahtuten security deposit an dah a tul tur thu sawi a ni bawk.