Aizawl: Urban Development & Poverty Alleviation (UD&PA) department chuan, July 20, 2020 khan Commerce & Industries department atangin New Market-a ‘Aizawl City Centre’ sakna tur hmuna building ding thinte thiah phalna a hmu a, chumi atanga kum hnih hnu, September 22, 2022-ah building sa tura thlan, Lushai Engineer hnenah hnenah Letter of Acceptance (LoA) hlan a ni.

ZALEN-in RTI hmanga a zawhna, UD&PA department SPIO-in a chhan danin, Aizawl Bazarpui (New Market)-a ‘Aizawl City Centre’ sakna atan Rs. vbc. 42.82 dah niin, Smart City Mission atanga sum hmuh a ni a, DPR chu Mizoram sawrkarin a pawm (approved) tawh.

Building thiah a nih atanga tun thlenga sak a la nih loh chhan SPIO tar lan danin, July 20, 2020-ah building thiah phalna hmuh a ni a, building design a nih dawnin, soil sample report atanga a structure design a ngaih avangin December 29, 2020-ah Commerce & Industries atangin soil sample lak a ni a, soil sample chu NIT Silchar-ah thawn niin, soil report atangin building design tan a ni.

Building estimate chu bazar sakna atana sum ruahman sa aia a tam vangin May 12, 2021-ah Commerce & Industries nen video conference hmangin a concept design enho a ni a, August 31, 2021-ah estimate en tha leh tura thutlukna siam niin, October 5, 2021-ah deputy chief minister thu angin bazar mamawh zat anga sak tur a nih thu leh a sakna tur pawisa pawh sum ruahman zat (Rs. vbc. 34) bak chu hmun dang atanga ngaihtuah a nih tur thu dawn a ni.

Hemi bawhzui hian Commerce & Industries department atanga dawr mamawh zat 1,103 angin design siam that leh a ni a, design thar berah dawr 1,105 leng tura ruahman a nih hnuah December 1, 2021-ah DPR Rs. vbc. 46.74 man chu Mizoram sawrkar atanga pawmna dawn a ni.

DPR chu ASCL Consultant (PMC) te nen enho a nih hnuah DPR amount chu Rs. vbc. 42.83-ah tihdanglam a ni a, chu chu sawrkar atangin March 11, 2022-ah approval hmuh leh a ni. Sawrkar atanga pawmna dawn a nih atangin tender document buaipui nghal niin, September 22, 2022 khan LoA chu Lushai Engineer hnenah hlan a ni.

SPIO tar lan danin, Aizawl City Centre Annexe building sak mek leh Aizawl City Centre sak tur chu hna hlawm khat a ni lo va, annexe building sak mek chu Commerce & Industries department hnuaia awm a ni.

New Market : Aizawl City Centre

Building sak tur block hnihah then a ni.

A hnuai ber parking leh cold storage tur niin, parking-ah 2 wheeler 79 leh 4 wheeler 31 a leng thei dawn.

Block A chu chhawng sarih tur niin, dawr 458 a awm ang.

Block B-ah dawr 647, chhawng nga a ni ang.