ZALEN March 6, 2025 : BCM rorelna sang ber Assembly vawi 129-na Chanmari BCM Biakin a neih mekah vawiin khan palai ten ro an rel. President nilai Rev. F. Ramdinmawia’n President Elect Rev. Dr. C. Vanlaldika hnênah chairmanship a hlân a, ani hian rorel a kaihruai nghal a, thu rel zingah hian sum an dawn leh hmanna tur bakah CHS hnuaia fee tih san te an rel. MPF sawmna la ngaihchan nise an ti.

Rorelnaah hian Pastor 2 leh Upa thi mi 93 sûnna ngawi renga din hnuah Rev. TC Laltlawmlova'n an rawng lo bâwl tawhna zawng zawngah lawmthu sawiin an chhungte leh an Kohhran kalsan tak te tân tawngtai hun a hmang.

General Secretary Rev. Dr. R. Lalbiakliana report atangin Pi Zomawii (Ms. JT Smith). Mizorama BMS Missionary chatuan ram pan ta chuan a ro Pound 1000 (Nuai 11 vel chu) Christian Hospital Serkawn a khawm tir a, Bualhranga te chhung Aizawl-in School of Nursing Boys Hostel sak nan Nuai 20 an pek thu leh March 2025 hian hawn tum a nih thu a tarlang. 

Rorel-ah hian Motor thar 10 lei nan Cheng 79,50,000/- pawmin Motor hmanlai 8 hralh tur a pawm a ni bawk. Budget cheng Nuai 13,274.56 pawm a ni a, Kohhran thawhlawm atangin cheng Nuai 9127.93 leh Department thawhchhuah tur cheng Nuai 4,146.63 a ni. A punna hi cheng Nuai 707.93 niin 5.63% a ni.

Mizoram People Forum a tel tura sawmna chu thu kallai niin Kohhran dang te ngaihdan zirchian a, la ngaihchan deuh nise tih Assembly 2024 in a lo pawm tawh chu tarlan a ni.

Christian Hospital Serkawn (CHS) bikah April 2024-Feb 2025 chhungin tanpuina Cheng 41,76,292/- dawn a ni a, damlo 339 te hnenah tanpuina Cheng 32,56,041/- sem a ni. Nursing School Serkawn Fee pawh tihsan a ni a, Admission fee Cheng 12950 atangin Cheng 20000-ah, Hostel Fee Rs. 4200 atangin Cheng 5000-ah, Day Scholar Fee Cheng 900 atangin Cheng 1500-ah tihsan a ni.

Assembly-ah hian BCM hnuaia hnathawk pension tawhte Politics-a an in hman zui chungchang pawh ngaihtuah turin a lut a, MKHC a tel zui zel chungchangah chuan Council for Churches in Mizoram (CCM) a din tawh avangin tel tawh loh nise tih CCM Executive meeting in rawtna a siam angin Assembly-ah hian report nise tih a ni. Mizotawng hman dik leh hman uar nise tih te leh ruihhlo do chhunzawm zel nise tih te agenda-ah a lut bawk a ni.