Aizawl: MLP Act tihchhuah a nih hnuah Mizoramah zu, beer leh wine-te khap a ni a, MLP Act hnuaia Rules (MLP Rules) siam thar hi December 19, 2019 khan tihchhuah a ni. He rules ang hi chuan Mizoram-ah beer leh wine siam leh zawrh a phal a, tunah sawrkar lam hian hralh dan thar tur a duan that avangin hralh chhuah a ni rih lo thung a, Champhai Grape Growers Society leh Baptist Church of Mizoram (BCM) te wine a an indawrna pawh tunah hian tih tawp lailawk a ni.

Beer leh wine siamtu hian a hma lama wine lo siam tawh Champhai leh Hnahlan lam winery pawhin hemi dan hnuaiah hian hma pawh thui tak an la tawh a, siam turin ruahmanna pawh thui tak an kalpui tawh a; mahse, Mizoram sawrkar lam hian phalna a la pek theih loh avang hma an la chhunzawm thei lo niin Zalen chuan thu a dawng.

Champhai Grape chingtute leh Baptist Church of Mizoram te hi 2018 atang khan sacrament sem tur chi wine-lei turin an indawr tan a, nikum 2019 pawh khan indawr chhunzawm leh turin inremna an ziak leh a; mahse, hetianga sawrkar lamin dan a siamthat leh tak avangin hian an indawrna pawh an titawp a, sawrkar lam hian phalna a pek leh hunah indawr chhunzawm leh an tum tih Champhai lam grape chingtu lam chuan Zalen an hrilh.

Tunah hian Champhai leh Hnahlan lam hian wine hi an siam reng tho a; mahse, sawrkar lamin phalna a pek theih loh avangin an hralh chhuak rih lo. Sawrkar lam chuan an hralh chhuah theih dan tur leh kalphung tur hi Excise lam pawhin rules hi an duang tawh a, mahse, a hmawr erawh an la bawk chiah lo niin thu dawnna chuan a sawi a, peih a nih thuai a rin a ni bawk.

Beer leh wine hi a duh duh tana siam theih a ni lo a, siam turin sawrkar atangin phalna neih a ngai a, hemi siam tura an hmanraw hman ngai extra neutral alcohol emaw rectified spirit emaw hi Excise & Narcotics Commissioner phalna neih a tul a ni.