Aizawl: MZP leh JAC on Inner Line Reserve Forest hruaitute chuan Zophai hmun a Assam in biak in an sak chu thiahsak nghal turin Mizoram sawrkar an phut a, Muslim biakin hi thiah a nih loh chuan Zofate Chawlhbuk sa turin Mizo thalaite an inbuatsaih ve nghal dawn niin an sawi.

MZP hruaitute leh JAC on Inner Line Reserve Forest hruaitute hian Zirtawpni tlai khan Home Minister Lalchamliana chu a chenna in Electric vengah an kawm a, Mizoram leh Assam ramri chungchang bakah Vairengte check-gate a harsatna chungchang te an sawipui a ni. Pawl pahnih hruaitute chuan Hrangkhawl hnam Aizawl lo kal tur te chu Vairengte Police in ILP an lo dil a, an nihna an sawi chung pawh a an hriatthiam duh loh thute leh an haw tir leh thu te an thlen a.

Hei bakah sawrkar laipui in Mizoram leh Assam ramri chungchang a urgent lehkha nikum 2018 kum tawp lama hmuh tawh tun thleng a Mizoram sawrkar in a la hup tlat an hriatthiam loh thu te, Mizoram leh Assam ramri ngaihtuah tu tura din Core Committee Chief Secretary Lalnunmawia Chuaungo kaihhruai meeting neih theih loh chungchang te an thlen a ni.

Home Minister chuan MZP hruaitute leh JAC on Inner Line Reserve Forest hruaitute thu thlen chu official lam a lo sawi-pui tur thu leh a tul anga a lo bawhzui tur thu a sawi a ni.