Bible chhiarchhuak te’n sawi nuam an ti. Chutih laiin chhiarchhuah chu sawi loh Lalthianghlimi w/o Lalchhuanawma (L), Ramhlun North a cheng mek chuan tum 5 a ziahchhuah tawh bakah tum 6 ziahchhuah leh tumin a inbuatsaih mek.

Zalen zawhna chhangin Lalthianghlimi (Mathiangi) chuan Bible a ziah tan chhan chu lusun khawharna avanga intan a ni tih a sawi a. "Ka pasala u leh ka pa an boral hian kan khawhar lutuk a, chhungkaw tan engtin nge malsawmna ka nih ang tiin ka ngaihtuah thin a. Bible chhiarin hun ka hmang a, ka fate ah nasa takin hna a thawk tih ka hriatin ka fate tan kutziak ngei Bible hnutchhiah duhna a awm a, chuvangin ka ziak ta a ni," tiin a sawi.

Mathiangi chuan Bible tum khat a ziah zawh hnuah a fate 2 hming kimin bu 1 dang a ziak leh a. Hemi hnu hian a pasal in 'I hah tawh emai, ziak tawh lo mai rawh' a tih avangin a chawlhsan a. Mahse a fapa in 'Ama (Nu) lehkha zir (ziak) leh rawh' a tih thin avangin a pasal pawhin 'I tih leh a tha anih hi' a tih avangin a ziak leh a ni. A pasal hian November 28,2018 khan a boral san a, a pasalin a boral san hma hian bu 3 a ziak zo hman a, a pasal boral hnuah bu 2 a zo leh a ni.

Bible ziah vangin hlawkna tam tak a chhar tih sawiin Mathiangi chuan, "Lusun tan Bible hi kan inhnemna tha ber a ni a. Kan khawharna min hnem a, ka fate ah Bible ngainatna a tuh bawk a, ka nunah ngei hian hlawkna tam tak ka chhar phah a ni. Lusun ni mah ila ka fate pawhin Bible ka ziah lai leh tawngtai laia ka mittui a tlak chuan an hrethiam zel a ni," a ti bawk. Bible ngaina se a duh avangin a ziah tawhna ah a fate chu kutziak an thiam hma pawhin an kut vawn sakin Bible chang 2/1 tal a ziahpui thin a ni.

Bible chu July ni 6,2015 khan a ziak tan tih sawiin a bu 5-na hi April ni 10,2020 (Good Friday) ni tak khan a ziak zo thei a. Tunah hian a bu 6-na tur chu ziak leh mekin Genesis bung 7 na a ziak mek a, a ziak zel thei ang em tih leh eng hunah nge a zawh ang tih chu Pathian thu thu niin a sawi. Lalthianghlimi hian BSI atangin certificate a dawng a, a lawina Ramhlun North Presbyterian Kohhran Hmeichhia chuan lawmpuina 'citation' an hlan tawh bawk.