Aizawl : Bihar inthlana venhimna hna thawk turin Mizoram sawrkarin police a tirh belh tur leh tur loh chu a la hriat loh niin ZALEN chuan thu a dawng a, Mizoram atang hian sipai company 4-te chuan Bihar hi an lo pan tawh.

Mizoram sawrkar hian Bihar inthlan neih mekah silai keng police company 4 chu a lo tir tawh a, sawrkar hian sipai engemaw zat a tirh belh leh dawn niin ZALEN chuan thu a dawng a, mahse, Mizoram Police lam chuan engmah hemi chungchangah hian hriat a la neih loh thu an sawi thung. Mizoram Police AIG J. Lalthafamkima chuan, “Tun dinhmunah kan tirh dawn leh dawn loh engmah sawi theih ka nei lo. Kal turin thu dawn engmah kan la nei lo," tiin a sawi.

Bihar 2020 state election hi thuang thuma neih tur niin, October 28, 2020 khan a tum khatna chu zawh a ni a, November 3 & 7, 2020 hian a tum hnihna leh thumna neih leh tur a ni. Mizoram atanga hian police company 8 central lam chuan a rawn dilsak a, state ramri buai avangin tirh loh turin thutlukna siam a ni hman a; mahse, company 4 chu tirh an ni ta tho a ni. Tunah hian company 4 chu inring renga awmtir an nih thu thudawnna hian a sawi.