Aizawl: Mara Autonomous District Council (MADC)-a BJP leh MNF tangrual Coordination Committee chuan an hruaitu atan M.Laikaw (BJP) an thlang a. Tun hnaia sawrkar atanga inhnukdawk MNF MDC-te chu an thlem lo niin Mizoram State BJP President Vanlalhmuaka’n a sawi.

ZALEN-in Siaha atanga thu a dawn danin Congress leh MNF intawm MADC sawrkar atanga inhnukdawk ta, MNF MDC-te leh BJP MDC-te hian BJP-MNF Coordination Committee dinin an hruaitu atan Siaha District BJP President M.Laikaw an thlang a. Deputy leader atan N.Viakhu (MNF) an thlang bawk a. Laikaw hi Chief Executive Member tur atan thlan a niin governor pawmpuina nghah mek a ni a. Deputy Leader Viakhu hi chairman, MADC atan thlan nawn leh tura ruahman a ni bawk. 

MADC-a sawrkar thar din chungchangah hian nimin khan State BJP President Vanlalhmuaka chuan an office-ah chanchinbumite a kawm a. Congress-MNF intawm sawrkar atanga inhnukdawk ta MNF MDC-te chu engmah nihna tiam emaw, va thlem emaw an nei lo niin a sawi a, anmahni duhthlanna ngeia BJP support an nih thu sawiin, BJP kaihhruai sawrkar nghet tak din an tum niin a sawi.

Vanlalhmuaka chuan, "MADC a MNF leh Congress ten an siam sawrkar hi mipui mandate nei lo, lal duh ringawt sawrkar an ni a. A hun takah  MNF leh Congress te  chungah Mara mipui aiawh ten huaisen takin hma an la ta a ni tih hi kan puang duh a ni,"a ti bawk. Mara Autonomous District Council ah hian seat 25 awmin BJP in seat 12, MNF in seat 9 leh INC in seat 4 an la a ni. 

Press miten kum 2023 MLA inthlanpuiah thawhpui an neih dawn leh dawn loh zawhna chhangin BJP President Hmuaka chuan, "Keimahni a sawrkarna chang ngei turin kan bei zel dawn a, kan thei lo anih chuan sawrkarna a tel ngei turin tan kan la dawn a ni," a ti a. Mizorama political party zingah Congress tih loh chu an thawhpui thei vek nia sawiin thutlukna erawh an party thuneitu sang kuta awm niin a sawi bawk.