Aizawl May 3, 2024 : BJP Mizoram chuan vawiin khan Friday Political Session neiin, Vanlalhmuaka, State President-in thusawina hun a nei a, Central Sawrkar tha chakna hmanga hma kan sawnna tur kawng dap a pawimawh a, mi retheite chawikan a tul a ti a, MNF leh ZPM a hmuh dan a sawi bawk

Vanlalhmuaka chuan, "Kan ram thatna tur kawng kan zawh tur hi kawng awlsam a ni lova, mipuite kan taimak zual zel a tul hle, kan ram leilung hausakna leh kan thiam, kan finna te hmang tangkaiin, kan thlai tharte hmanga ram mipui kan chawm hi a pawimawh a, Central Sawrkar tha chakna hmanga hma kan sawnna tur kawng kan dap hi a pawimawh hle a, kan rama mi retheite hi kan chawikan a tul takzet a ni," a ti.

Hmuaka chuan MNF a hmu dan sawiin, "Mizoram Politics hi a mak thin hle a, MNF Party NDA inti siin, Congress Party an thawhpui thei tlat a, hei hian NDA tak tak an nih leh nih loh an ti chiang zawk a ni. Tuna kan ram mamawh min pe theitu chu NDA a nih laia tualto party hlun tak MNF-in hetianga Central-a party tluchhe mek a thawhpui duh hian party tum mumal nei tawhlo an nih zia a tarlang a ni," a ti.

Hmuaka chuan ZPM a hmuh dan sawiin, "Tunlai hian Restaurant changkang tak takah te ualau taka zu zuar an awm thin thu hi mi tam takin an sawi a, ZPM kaihhruai sawrkarin zu an zawrh ngam tak tak si loh laiin, ualau takin mipuiin zu an zuar leh si hi pawi kan ti a. Kan state sawrkar khalhngil hi kan tum a ni a, kan state sawrkar hnuaiah hian kan ram leh mipuite tana tha lo tur a thlen hi kan duh lova, kuthnathawktute'n an thlaithar tha taka an hralh a, an thawh hah mila a hlawkna leh hlawhtlinna an hmuh hi kan duhsak takzet a ni," a ti bawk.