Aizawl : BJP Mizoram Pradesh chuan Covid-19 in laka kan ram leh hnam kan lo him zawk theih nan Mizoram chhunga party anga kan chet lakna zawng zawng State Office atanga thu chhuah dang siam a nih hma chu chawlhsan vek turin March 20, 2020 tur thu an puang a, an president Vanlalhmuaka chuan khawvelin a buaipui mek Coronavirus laka kan him theihna turin sawrkar chu puih a inhuam thu a sawi a, Prime Minister hnenah pawh Mizoram sawrkar ngenna chu lo ngaihpawimawh sak turin a thlen tawh tih a sawi.

Covid-19 hrik enna khawl chungchanga chanchinbumi te zawhna a chhan naah Vanlahmuaka chuan, "Mizoram tan a nih chuan theih tawp kan chhuah tlang ang. Prime Minister hnenah pawh lehkha ka thawn vek tawh a, BJP president leh OB dang te pawhin an hmu vek ang. Mizoram sawrkar atanga dilna a awm a nih chuan lo ngaihtuah nghal turin ngenna ka siam tawh a ni," a ti. Hmuaka hian he natna changchawi hian Tripura te chuan an medical college leh hospital te tih changtlunna atan an hmang niin a sawi bawk.

BJP president hian Prime Minister thuchah chu mipui te zawm ngei turin a ngen nawn a, vawiin tlai dar 5-a Covid-19 buaipuia hna thawk zawng zawng te chawimawina hun, hman turah pawh mahni theih ang anga thawm chhuah turin mipui te a ngen a, kan ramah chuan a bikin YMA ten chawimawi an phu a, an pual hian thawm kan chhuah pawh ngai a tih thu a sawi.