Aizawl: MPCC chuan MNF sawrkar chu central BJP sawrkar dan siam dodal ngam loah an puh.

Nimin chhun khan Aizawl Press Club-ah thuthar thehdarhtute kawmin MPCC Media Chairman Lallianchhunga chuan sawrkar laipuiin Indian Forest Act, 1927 Amendment Bill siam a tum chu Mizo mipuite tan a him loh avangin an duh loh thu memorandum siamin Mizoram Chief Minister hnenah August 28, 2019 khan an thehlut tih a sawi a.

MPCC-in dan him tawk lo nia an sawite chu tlangram lo neih (Shifting Cultivation) kum bithliah chhunga khap tumna chu shifting cultivation a la innghat Mizorama thingtlang mi tam takte tan a him lo niin a sawi bawk a ni.

Hei bakah hian Forest Settlement Officer-te hnena tribal-te ram hnehchhuh theihna dan pek tumna te, Reserved Forest atana rua-hman area-a chengte laka state sawrkar thuneihna sang tak pek a ni chu tha lo an tih thu leh hei hi thing-tlang mi tam takte dikna chanvo rah beh theihna nia an hriat thu te, Forest Officers, Police Officer leh Revenue Officer-te hnena warrant tel kher lo a mi man theihna thuneihna sang tak pek a ni te, dan bawhchhia te ‘non-bailable’ a man theihna thuneihna te, Forest Officer-te warrant tel loa ramngaw atanga siam chhuah hmanraw hrang hrang awmna ni a an rinhlelhte in dap theihna te chu tha lo an ti hle niin a sawi.

Lallianchhunga chuan dan siamthat tumna chuan The Scheduled Tribes and Other Traditional Forest Dwellers (Recognition of Forest Rights) Act, 2006 (FRA) chu nasa takin a palzut dawn nia sawiin hei hian India rama tribal hrang hrangten an ei leh bar zawnna kawnga ramhnuai leh a hausakna kum rei tak an lo hman tangkai tawhte chu zawi zawiin a nuai bo dawn tih a sawi a. Sawrkar laipuiin he dan chung-changa inrawnkhawmna nei tura a hriattir pawh Mizoram sawrkarin engmah a la buatsaih lo chu mak an tih thu a sawi bawk.

Indian Forest Act, 1927 Amendment Bill dan siamthat tumna zirchiang tur hian MPCC chuan member 4 awmna Study Group a din a, member-te chu Lallianchhunga (Asst. Prof. MZU), Convenor, Lalsawta (former Finance Minister), K. Riachho, IAS (Rtd) leh R.C. Thanga, Advocate te an ni.