Aizawl April 12, 2024 : BJP Mizoram Spokesperson Lalremsangi Fanai chuan Mizoram Lok Sabha MP seat pakhat inchuhin MP Candidate 6 an awm a. Tling tur chu kawng khatah dah ila, heng zinga Congress Candidate Lalbiakzama chauh lo chu Rulling Bench BJP sawrkarna lama thu a, BJP thawhpui thei, thian tha a BJP neih tum vek tur niin a sawi a, CAA, UCC leh Article 371G chungchang a sawi bawk.

Teteii chuan, "Congress Party Candidate Lalbiakzama’n Politics chhunga hnam leh hnam, sakhua leh sakhua inhuat theihna hawia BJP do turin Congress Party ka zawm, Congress hotuten BJP chu Kristiante min nuai chimih tumtu, Secular paihbo tum tu, UCC kalpui tumtu, Article 370 lak kian chungchang sawi zawm a Mizo mipuite min sawithaihna tawngkam an chhakchhuak fo hi Mizoram BJP chuan tha a ti lo hle," a ti.

Citizen Ammentment Act chungchang sawiin BJP thupuangtu chuan, "CAA hi engtianga hman tur nge tih zirchiang hauh lo-in kan insawithaih vak a, Party leh kan MP te nasa takin kan dem a. CAA hman a nih pawhin North East Tribal te min huam ve lo tih kan hmu. Chuvangin Meghalaya Lok Sabha MP Agatha Sangma, Mizoram Lok Sabha MP Lalrosanga te pawhin Bill thlawp zawng in Vote an pe ta a ni. Central emaw State sawrkarin sakhua leh hnam, mihring cheng te hman tura dan siam emaw, dan thar siam tur hian Tribal State te min huam vek loh Bill pass a awm fo," a ti.

Uniform Civil Code chungchang sawiin, "UCC hi enge a nih chiah tih te pawh hi Mipui leh Politician te pawhin kan hrechiang lo. Mizoram ah inneihna, inthenna leh rokhawm thu ah buaina neuh neuh a tam hle. Nupa inthenna kawnga India rama inthen tamna ber State kan ni hial a sawi a ni. Society & Community chhunga inneih leh inthen awlsam lutuk hian khawtlang nun bakah, ram than chhohna tur kawngah a thalo zawngin nghawng a nei nasa thei tih pawh zirchianna lama hmuh a ni. Mithiam tam tak chuan India Union ram khat kan nih anga inneih, inthen, rokhawm thu ah dan tlanglawn hman rual theih tur neih tha tihna atanga UCC hi lo ri chhuak a ni. UCC hi hrechiang loin kan insawithaih nghal vak a, Tuna tul ber chu Research base hmanga zirchian hmasak a, a tul anga chiang felfai taka mipui zirtirna pek hmasak a ni," a ti.

Article 371G nuaibo a hlauhawm leh awm loh chungchang sawiin, "Mizote zingah hian keini Mizoram State Special Provision Art 371G pawh lak bo mai hlauhawm leh him lo tiin kan insawithawih fo a. Engvangin nge min lak bo sak ve ang, tih hi zawhna pawimawh a ni. Jammu & Kashmir history leh Mizote history hi thawnthu hran hlak a nih bakah, Jammu & Kashmir angin mipui thlan sorkar ding hleithei lo, mipuite ralmuanna awm lo, hmasawnna kal thei lo, Law & Order kenkawhna tlachhia-in, President’s Rule ah lut ve fo ni ila, insawithaihna awmze nei a ni thei chauh ang," a ti. 

Lalremsangi Fanai chuan, "Congress Party hian India Democracy dinhmun a nghing, PM Modi kaihhruai BJP a sawrkar leh chuan India ram hi kan inthlang tawh lovang, kan inthlan pawhin Russia ram inthlang angin inthlanna thianghlim a awm thei tawh lovang, tihte an sawi a. Hei hi Congress Party Election chak loh Opposition dinhmun auhla, PM A.B Vajpayee sawrkar lai 1996-1997-1998 atanga an auhla ngai reng a ni. Chutiang bawkin, India rama Kristiante nasataka nekchepna leh nuai chimih tumna thleng anga an tlangau pawh hi Opposition an niha an auhla Solfa ki pangngai reng, Ruling an nih veleha an thulkhung that thin a ni. PM Modi chuan “Ka India hi ka chhungte(My India is my family)” tiin a sawi a. Mizoram a Political Party Worker tinin Party a kan awmna, nihna leh election hi thil tha thlentirna atan hmang theuh ang u,” a ti bawk.