ZALEN July 21, 2023 : BJP Mizoram State President Vanlalhmuaka chuan AAP Mizoram te Mizo hnam nun ze mawi tichhia leh tidal zawnga che, Vai tih dan tha lo hmanga mipui fuihpawrh chawp tum, mi office tual zawla buaina cho chhuak zawnga nawrh dan Mizorama seng lut lo turin a chah a, Mizo Kristian takin AAP thiam turin a ti. 

Vanlalhmuaka BJP Mizoram State President chuan, "PM Narendra Modi-a'n tun hnaia Manipur-a kan Vaiphei unau hmeichhiate chunga thil thleng avang khan ka thin a ti ur in rilru a ti na takzet a ni," tiin, Manipur-a thil thleng hi pawi a tih thu sawi a ni.

Hmuaka chuan, "'Mihring pangngai tu pawhin Manipur-a thil thleng hi kan dem in zahthlâk kan ti ang. State tin Chief Minister te Dan leh Thupek kenkawh kawng ah chak lehzual a kengkawh turin ka chah che u a, a bik takin hmeichhia te tan phei chuan venhimna a tha lehzual tur a ni,' tiin kan PM zahawm tak Pu Narendra Modi chuan a sawi a ni," a ti.

AAP te an office kawta an punkhawm chungchang sawiin Hmuaka chuan, "Vawiinah pawh hei kan hriat theuh angin AAP inti emaw ni te'n, Mizo in kan tih ngai lem loh Mizo mipui fuihpawrh tuma, kan party Office kawta, an vai pu te tih lawm tum a Protest/nawrhna an rawn neih kan hmuh hi, Mizo nun zemawi tihchhiat tumna leh tih dal tumna hmanrua a ni tih hi Mizoram mipuite hian kan hriat a ngai a. Mizo Kristian chhul chhuak chuan hetiang ang thil kan hnam tana pawi thei hi kan hre tur a ni. Keini pawh kan hotute chu Vai an ni. Ti tura min tih ang zawng zawng kan ti ve ngai lo. 'Mizo in kan ti ve ngai lo' tih chin hi kan nei a AAP Mizoram te hian min hetiang thil ah chuan min rawn thin se tih hi kan chah duh a ni," a ti.