Aizawl January 24, 2023: BJP National Office Bearers meeting leh National Executive Meeting chhim zo BJP Mizoram President Vanlalhmuaka chuan Mizoram Chief Minister Zoramthanga chu Covid-19 chhuanlama hmang tawh lo tura a duh thu a sawi a, state dang te chuan Covid-19 hripui chu sum siam nan hmang lovin hmasawn nan an hmang tih hrilh a duh thu a sawi.

Vawiina Chanchinthar lakhawmtute a hmachhawn naah Vanlalhmuaka chuan, "Kan CM-in Covid-19 chhuanlam a hmanga, kan state sum harsat thu a sawi fo hi thubelh chian dawl lo leh financial management-a a hlawhchham zia a phat marna mai a ni tih hi Mizoram mipui hriatah ka sawi duh a. Sawrkar laipui leh India Econmomy hi Covid hripui avangin sum lamah a harsat phahin, hmasawnna kawngah a thuanawp phah lo. Covid hripui leng avangin India sawrkar leh state dang te chuan financial management leh development management ah nasa takin tan an la. Covid -19 hripui chu sum siam nan hmang lovin, hmasawnna ruhrel siam nan an hmang a. State tinin Covid-19 kha hmasawn nan an hmang a ni tih hi kan Chief Minister zahawm tak ka hrilh duh a ni," a ti.

BJP Mizoram President chuan Mizoram mipuite Media kaltlangin Chibai tha ber a buk a. Kum tawpa MLA Election kan hmachhawn Mizoram mipui te mitin mamawh hmasawnna/ Development a taka thlen theitu tur sawrkar tha leh rintlak, Mipui hnena an intiamna (Election Manifesto) tipuitling thin sawrkar, thenawm state te'n an sawrkar tir BJP, Modi-a kaihhruai Mizoram-ah enchhin a, sawrkar tir chhin turin a sawm. 

Hmuaka chuan, "BJP hi Mizorama kan sawrkar chuan Education, Health & Infrastructure hi National Standard ah siam/ buatsaih hi kan top priority a ni dawn a ni. Mizoram hi Education Hub, Health Tourist Destination atan kan buatsaih dawn. Mizorama mitinin intodelhna atan kan mamawh Hmasawnna ruhrel (Infrastructure) kan tlakchham pawh hre lo hial khawpa kan tlakchhamna hi, national standard a nei thei turin hma kan la nghal dawn a ni," a ti. 

BJP State President chuan, "BJP hi Mizorama kan sawrkar chuan Assam state nen a kan ramri buai te chin fel a ni tawh ang a;  Internation Border Trade – Zokhawthar, Kawrpuichhuah leh Zorinpui, a thu chauh a kan sawi kan sawi thin te chu a tak ram a chang tawh ang a; Kan CM-in Mau a atchilh bur mai anga angaihna hriat leh si loh chu keini chuan Assam, Tripura leh Arunachal leh Meghalaya te angin kan hmang tangkai tawh thung ang," a ti. 

BJP Mizoram President chuan BJP National Office Bearers meeting leh National Executive Meeting chu BJP sawrkarana state tan chuan hun remchang tak a ni tih a sawi a, Union minister leh Minister of State te awlsam taka hmuh theihna hun a nih thu a sawi a, chutihrualin state a thuneitu nih loh chuan a chhawr hleih theih loh tiin pawi a tih thu a sawi. Tun tumah pawh hian minister a hmuh nual thu a sawi bawk.