Aizawl : BJP Mizoram Pradesh chuan nimin khan AMC Area hmun hrang hrang, candidate an neihna ward-ah te Street Campaign an nei.

Ward No-XI Candidate Pu Lalrinawma bial leh Ward No-X Candidate Pi Gracy Vanlalawmpuii bialah Vanlalhmuaka State President in thusawina hun a nei a. Vanlalhmuaka chuan, “BJP chuan kalphung fel tak kan nei a, thil kan ti ang kan tih chu ti thin Party kan ni a, Party thenkhat anga Manifesto inziah thatsiak mai mai ang kan ni lo tih hi ka sawi duh a ni. BJP chuan Mitinin anchanpual tur an chan theih nan a hmalakna hi India ram pum huap a kan hmalak mekna a ni a, chuvangin mi tin thleng phak development buaipui tak takte chu keini BJP-te chiah hi kan ni,” a ti.

AMC a BJP dinna bial zawng zawng te chu thlantlin kan nih ngat chuan Union Minister for Urban & Housing Affairs, Hardeep Singh Puri AMC changtu chuan kan bial a rawn rap ngei ngei dawn a, heng Ward mamawh piah lamah Aizawl khawpuiin Smart City ni tura kan mamawhte chu kan hmu ngei ngei dawn a, Govt Complex ah pawh Mizoram Sorkarin State Sports Coaching Centre saknan Nuai 20 pek an tum niin ka hria a, Ward No-X na Candidate Pi Gracy Vanlalawmpuii thlantlin a nih ngat chuan Sports Coaching Centre tihchangtlun nan Crore 20 kan pe thung ang che u,” a ti bawk.

Hmuaka chuan, “Mizoram sorkar hian sum ah harsatna lian tak an tawk mek a, a hnathawk pension te hlawh pawh a pe hleithei lo va, sorkar hnathawk GPF withdraw tur pawh a awm hleithei tawh lo va, contractor ten bill an la thei lo bawk a, sum chung changah chuan awm lo tih ani deuh vek mai a ni. Thil tak tak an ti thei tawh lo a, an mahni sawi pawh hi an inawihsak duh tawh lo hial awm e, tunhnaia an tuipui leh an tih ber chu sum awm si lova Granite Phurh kuala phum hi a ni tawh mai in a lang a, an khawngaihthlak tawh tak zet a ni,” a ti.