Aizawl June 25, 2024 : Vawiin khan BJP te chuan BJP State Office, Mipui Rûn, Upper Republic-ah 1975 Emergency 'Black Day of Democracy' puala hun an hmang a, State Vice President Vanupa Zathang, IPS (Retd)-in thusawina hun neiin, Indira Gandhi-in, 'Emergency' a puan chungchang Video Clips en ho a ni bawk.

Vanupa Zathang, IPS (Retd), State Vice President chuan, "Kum 1975-a Emergency puan a nih ni (25th June, 1975) atanga kum 50-na hman niin, India ram hmun hrang hrangah he hun hi hman a ni a, National Emergency puan hi India history ah hun thim lai ber nia sawi a ni a, hei vang hian India hmangaihtute an rum a, Congress thil tih tawh ah chuan ngaihdam theih ngai tawh loh tur a ni," a ti.

Vanupa chuan, "Emergency puan a nih hunlai khan Sorkar hnathawk leh Media mite an dikna chanvo rahbehsak niin, India Danpui tih bawrhban a ni a, MISA dan hmangin chhan mumal pawh awm lovin mi tam tak man an ni a, dân bawhchhiat leh palzutna in ram pum a tuam a ni. Mizoramah ngei pawh Mizo zingah Emergency hunlai hian lungin tang engemaw zat an awm a, chung zinga langsar deuh te chu- Brig T.Sailo, Pu R.Vanlawma, Pu C.Vulluaia, Pi Sanglianchhungi te an ni. Anni bakah hian MISA dan hmanga Jail tang Mizo zingah tam tak an awm a, heng mite hi BJP Mizoram chuan kan chhuangin kan ngai hlu hle a ni," a ti.

Vanupa Zathang chuan sawi chhunzawmin, "1975-a National Emergency puan hi Mizoram thlengin kan tuar a, thla 21 zet he Emergency puan avanga kan tawrhna te kha mi tam tak chuan kan la hre awm e, hetiang thil duhawmlo hi thleng nawn tawhlo se, India ram ropui Democracy Ram lian ber ah hian zalen taka ram mipui te'n duh kan thlan hi a pawimawh a, tih luihna-a ram min hruaitu te'n fel leh dik leh ṭha ber awm ang taka tunlaia mipui min zirtir ṭhin te hi a letling hle a, History hi kan enlet a, kan zir thar fo a ngai a ni. Chuvangin Thangtharte'n he National Emergency 1975-a puan a nih dan hi kan hriat a, kan zir thar leh a, Politics dik kan hriat a ngai a, zirtirna dik leh kalphung dik pawh kan hriat chhuah angai a ni," a ti bawk.