Aizawl : Vawiin Febuary ni 3.2024 (Inrinni) khan MPCC Treasurer Dr. Lalmalsawma Nghaka chuan Kumthar atana Tuirial, Kolasib leh Serlui biala Congress Block hruaitute nen inkawm hona leh infuihtharna hun a hmanpui a, BJP ten India pawisa note-ah Mahatma Gandhi thlalak aia Hindu pathian Rama thlalak chuan tir tumin hma an la mek niin a sawi.

He hunah hian Dr. Lalmalsawma chuan, "Sakhaw dang betuten nunna tam tak an chan phahna Uttar Pradesh state-a Ayodhya Hindu Temple chu January ni 22, 2024 (Thawhlehni) ah hawn a ni. Madhya Pradesh State-ah Kristian te an chep zual a, Anti-conversion Law behchhanin Kristian 500 dawn 2023-2024 January chhungin man an ni tawh. Kumin 2024 MP inthlan kuma BJP sawrkar-in Hindu-te Hindu-na chawhthawh an tumna hlauhawm tam tak zingah India pawisa note-ah pawh Mahatma Gandhi thlalak aia Hindu pathian Rama thlalak chuan tir tumin hma an la mek a ni. Hindu pathian chuang pawisa hi Kristian te'n Pathian ram thawhlawma kan thawh a ngaih lohna turin Mizorama Kristian te kan tanho hi tihmakmawh a ni," a ti.

Dr. Lalmalsawma chuan, Kolasib District-a Hmunphiah chingtuten Hmunphiah hralhna kawngah harsatna an tawk chu pawi a tih thu sawiin, "Sawrkarin Hmunphiah lei turin RR Associates, Kamrup, Assam thawhpui a, Hmunphiah Ro kg khat Rs.100/- aia tlawm loa lei sak tura ruahmanna a siam chu thil lawmawm tak angin lang mah se, Hmunphiah a hringa hralhtu hi tam tak an nih avangin a hralhna chungchangah kum dang aiin harsatna an tawh nasat phah zawk a ni," a ti.