Aizawl: Mizoram state BJP President Vanlalhmuaka’n Mizoramah politics a inlumlet mek tih sawiin, a tuar ber tur chu MNF leh Congress an nih thu te, anni lam chuan an party zawm duh tupawh an welcome vek thu te a sawi.

ZALEN zawhna chhangin Mizoram BJP president chuan inthlan dawnah politics inlumlet a awm thin tih a sawi a, “Kum 2018 inthlan dawnah a lo awm tawh a, chumi ang chuan kuminah pawh a awm mek, hei hi chu politics boruak inher vel a ni a, a thleng dik chho dawn ni pawhin a lang,” a ti.

MLA ni mek zingah an party zawm tum an awm leh awm loh chungchang leh beisei an neih dan chungchangah Vanlalhmuaka chuan, tun dinhmunah chuan beiseina neih thiam a la har rih thu te, an rin aia tam pawh an neih theih thu te a sawi. “Politics boruak a inlumlet mek a, sawilawk thiam a la har rih,” tiin, tupawh Mizoram siam duha Mizoram hmasawnna atana thawk duh zawng zawngte chu an welcome vek tih a sawi.

Tunlai politics boruak inlumlet tuar ber turte chu Mizoram a sawrkarna lo siam tawh, MNF leh Congress an nih thu sawi bawkin, “Mizorama sawrkarna lo siam tawh ve ve an ni a, mipuiin an en a, belhtlakah an ngai tawh si lo a... MLA zingah pawh hnathawh duh tak tak an awm a, eng angin nge Zoram tan kan thawhhlawk theih ber ang tih ngaihtuahin Zoram politics hi a insingsa mek niin ka hria,” Mizoram state BJP president chuan a ti.