ZALEN February 11, 2025 : Bangalore Mizo Association (BMA) chuan Karnataka state (a bikin Bangalore) lamah Mizo engemaw zatin zirna tur an zawnna kawngah leh hnathawh tur an zawnna kawngah bumna leh buaina eng eng emaw an tawk fo a. Hemi chungchangah hian Bangalore Mizo Association Executive Committee chuan thuchhuah a siam.

Mimal, chhungkua leh a hnam ang zawng pawha kan himna a nih theih nan he kan thuchhuah hi min lo chhiar sak a, chhungkhat laina bakah thiante hnenah te min lo hrilh chhawnsak turin kan in ngen tak meuh meuh a ni.

1. Zirna chungchanga hriattir

Admission tih kawngah inbumna a tam em em mai a. Mizoram-ah AGENT/BROKER te hmanga inbumna leh ram pawnah pawh AGENT/BROKER te hmang bawka inbumna a awm thin. Chuvangin hengte hriat tur a ni.

Kan hmelhriat chian ngei te pawhin min bum thei a ni tih hriat tur.

Zirna tur leh a hmun hriat chian hmaa admission fee leh pawisa dang pekchhuah hmasak hi tihloh tur a ni.

Admission te hi mahni ngeia a hmuna kala tih theih hram tum a tha. A chhan chu a hmun leh hma bakah a him leh himloh te thlenga mita hmuh hi a tul.

Mahni ngei kala kan ti theilo a nih pawhin kan zir duhna hmuna awm Mizo hruaitute biak rawn a tha a. Hetiang thilah chuan mi rawn tam a tha awm e.

Nursing College/institution felfailo a tam a, chuvangin eng ang affiliation nei nge a nih tih hriat chian hmasak tur.

Institution contact number leh address chiang tak hriat tur a ni.

Kan zir duhna college/Institution chuan hostel tha leh him a neih leh neih loh hriat hmasak tur a ni.

College tam takin hostel an nei tello thin a. College hnaiah awmna tur a awm leh awmloh chian hmasak te pawh a him.

Handout leh brochure, flyer, pamphlet mawi leh changkan hmel taka siam chawp leh website lem hmanga mi bum thin an awm tih hriat a tha.

2. Hna zawnna kawnga hriattur:

Hnathawh tur kan zawnna kawngah pawh kan fimkhur a tul hle. Bangalore (leh khawpui dang) ah hian hna thawh tur a tam a, chutihlaiin hna himlo a tam tih hriat bawk tur a ni. Helai Bangalore-a awm Mizo thenkhat sum duh avanga an Mizopuite lo bum ta mai thawm hriat tur a awm ta zauh zauh mai.

Social media lama hnathawh tur hria ni a insawi tam tak lakah fimkhur tur. Mihring inzawrhna thlenga inkawhhmuh duh an awm ta nawk mai.

Hnathawhna tur te nena indawr fel hmain an hna chungchang leh inenkawlna hriatfel hmasak tur a ni.

Parlor, spa, hotel leh restaurant a hna in kawh hmuh kawngah harsatna tawk an awm fo a. Chu’ng hmunte chu hnathawhna atan a him em tih te, awmna an pe tel em tihte hriat hmasak ngei ngei tur a ni.

Hlawh, accommodation leh terms and conditions te hriat chian a, contract felfai tak ziaka a ruaitute signature nen thlap neih tur a ni.

Ruihtheihthil titen buaina an tawk nasa thin a. Hetiang kan nih loh nan ruihtheihthil laka fihlim nih tum tur a ni.

Mahni duh hun hunah hna atanga a ban theihloh tih hi hriat a tha a. Chhan mumal a awm loh chuan hlawh te thlengin a chan theih a ni tih hriat tur.

Hnathawhna tur tihfel hmain BMA hruaitute hnen atanga thurawn lak te pawh a him hle ang.

Vairama hnathawh hi a zelthel theihloh tih hi hriat hmasak a tha. Phone khawih leh thut mai mai theihlohna hmun hnathawhna an ni deuh fur a ni.

Zirna chungchangah hian a bikin Nursing College lamah hian inbumna a tam em em mai a. Mizoram atanga seat inhmuhsak ni a insawi leh admission lo tihsak thei ni a insawite hnenah sum pekchhuah hmasak loh hi a him tih hriat tur a ni. Tin, admission tih hmain nursing college te chuan affiliation (INC/KNC) felfai tak leh hospital hman (attached) a neih leh neihloh hriat ngei ngei bawk tur a ni. Zirna hmun thlan fuh leh fuhloh hian hmalam hun a keng tel tih hriata mahni zirna tur hi chu mahni ngeia buaipui theih nise a tha ber.

Hnathawhna tur him lo leh hrisel lo a tam avangin nu leh paten in fate hna zawnga lokal tumte in fimkhurpui loh chuan in beiseiloh thil in tawng thei tih hriat a tha a. Lehkha zir sanglo tan fimkhur a tul leh zual. Mizorama hnathawh dan leh vairama hnathawh dan, a hahthlak dan leh a hna hrim hrim pawh a inanglo tih hi hriat hmasak bawk tur a ni. A inthlahdah theihloh a, duh hunah a chawlh mai mai theih loh bawk a. Chutihlaiin, hnathawhnain a zir chuan a felfai hle thung bawk.

Heng kan thuchhuaha ziahlan hi a tlangpui chauh a ni, ziahkim sen a nilo thei ang. Chutihlaiin, fimkhur a ngaihna kan thuchhuah avang hian a himna leh thatna lam a awmlo emaw hnathawh tur leh zirna zawng emawin in lo kal hreh phah ang tih kan hlau hle a. Lehkhathiam, mifel leh fimkhur thiam tan hnathawh tur leh zirtur tha tak tak a tam mai tih erawh kan hriat tel kan duh. Bangalore a zir tum emaw hnathawh tum emaw chuan Bangalore Mizo Association hruaitute emaw chhungkhat awmte emaw biak rawn hmasak a pawimawh hle a ni.