Aizawl October 25, 2022: Vawiin khan AMC rorelna sang ber, AMC Board of Councillor (BOC) meeting neih a ni a, Aizawl khawpui hmasawnna atana tul leh mamawh te sawiho a ni. Thutlukna langsar zual zingah - Councillor tih chu Corporator tia thlak turin thutlukna siam a ni a, AMC area zauh a nih theihna tura hmalak rawtna an pawm a, Bawngkawn to Chanmari kawng “Laldenga Road” a phuah a remti bawk a ni.

Kum 2015 khan Aizawl Municipal Council chu Aizawl khawpuia cheng nuai thum (3) chuang a nih tak avangin corporation-ah hlankai a lo ni tawh a; corporation a hlankai a nih tak avangin Aizawl Municipal Council tih chu Aizawl Municipal Corporation tih a lo ni ta a, a hmaa Chairman tih thin chu chu Mayor tia thlak a ni a, Vice Chairman chu Deputy Mayor ti a thlakin, Chief Executive Officer chu Municipal Commissioner tia thlak a lo ni tawh bawk a ni. Hetiang a lo nih tak avang hian Lalfakzuala Chenkual, Councillor hnen atangin ward atanga thlan chhuah te Councillor tih hming pu hi Corporator tia thlak rawtna a lut a, rawtna hi sawiho a nih hnuah BOC hian a pawmpui a ni.

Aizawl khawpui hmasawnna tur ngaihtuahin leh kum tamtak hnua development awm tur thlirin AMC area hi zauh zel a tul nia hriat a ni a, Board of Councillor meeting-in uluk taka a ngaihtuah hnuah AMC area zauh a nih theihna tura hmalak tha a ti a, a tul anga hma lak an rel a ni.

Bawngkawn to Chanmari via Ramhlun kawng chu Mizoram State puitling a nih hnua Chief Minister hmasa hming chawia 'Laldenga Road' phuah chu BOC meeting hian a pawm a, Chaltlang Diet peng, Chaltlang Bethel kawng hnuai peng atanga PWD road DIET leh F. Malsawma In inkar atanga Laikunga (L) kawt thleng “Laikunga Road” a phuah rawtna chu meeting hian a pawm bawk a ni.