Aizawl July 28, 2024 : Sawrkar hmasa MNF Ministry-in Mualkhang Bottling Plant siamthat leh tih-lenna tura hma a lo lak tawhna kal zelah Bottling Plant lian zawk siamna tur sanction order July ni 22, 2024 khan Indian Oil Corporation Ltd. (IOCL) chuan Mizoram Sawrkar thar kutah a hlan a. MNF Ministry-in ram mamawh belh ang lei belha lungphum phum mai theiha a lo peihfel vek hnuah Mualkhang Bottling Plant lian zawka siamna tur sanction order a chhuak ta chu MNF chuan lawmawm an ti.

Ram mipui nitin mamawh phuhrukna tur ram rotling a nih ngei theih nan uluk taka vil zui turin ZPM kaihhruai Sawrkar leh FCS&CA Minister te a chah nghal bawk.

Mizoram mipui nitin mamawh Gas hnianghnar tak hmuh theihna tura MNF Ministry hmalakna 'LPG Bottling Plant' siamthatna leh tih-lenna tur sanction order a chhuak ta hi MNF chuan lawmawm a tiin Central Sawrkar, Ministry of Petroleum & Natural Gas leh Indian Oil Corporation Limited chungah lawmthu a sawi a. Ram mipui mamawh LPG Bottling Plant lian zawk neih theihna tura theihtawp chhuahtute khatihlaia Chief Minister Zoramthanga, FCS&CA Minister K. Lalrinliana, Revenue Minister Lalruatkima te bakah, a hlawhtlin theihna tura tha leh zung sengtute chungah lawmthu an sawi a, chhuanawm an ti bawk.

Hetiang hi thil awmdan dik tak a nih laia Sawrkar hmasain theihtawp chhuaha LPG Bottling Plant siamthat leh tih-lenna tura tha leh sum a lo sen tawhna sawi bo a, Sawrkar thar hmalakna vek anga FCS&CA Minister-in Sawrkar thuchhuah a siamtir duh hi MNF chuan mak a ti a! Sawrkar hmasa hmalakna engmah awmlo ang maia sawi duh Minister hrawn hi MNF chuan vanduaithlak a ti a; 'Nu leh Pa' te In sak zawh saa 'name plate' tar lo tum ve ngawt angah a chan a ni.

ZPM kaihhruai Sawrkar hi naupang chhe zia pu chunga Sawrkar kal tawhte puhchhiatna tur ringawt zawng tawh lova puitlin lam pan turin an duhsak a. Sawrkar hmasa MNF Ministry hmalakna avanga sanction order lo awm ta Mualkhang LPG Bottling Plant siam lenna leh siamthatna tur pawh hi ram mipui nitin mamawh phuhrukna tur ram rotling a nih ngei theih nan uluk taka vil zui ngei turin MNF chuan ZPM kaihhruai Sawrkar leh FCS&CA Minister te a chah nghal bawk.