ZALEN: Sports & Youth Services(S&YS) Department chuan Zirtawpni chhun dar 12:00 (10th May 2024) khan Boxing Academy atana Nuai 26 pek tawh tun thlenga la din a nih loh thu-ah insawifiah turin Mizoram Boxing Association(MIZBA) hruaitute chu meeting ho turin an ko a. Hruaitu nilai atangin President C.Laltanpuia leh Secretary General nilai Saithangpuia Sailo te an kal a, hruaitu hlui kal an awm bawk a. Nuai 26 hman dan zawhfiahna RTI lutin chhan fel a ni tawh bawk a ni. 

S&YS leh MIZBA meeting chu

Thudawnna-in a sawi dan chuan Sports & Youth Services Deptt. hotute chuan MIZBA hruaitute chu Boxing Academy atana sum an release Rs.Nuai 26 an hmanna an zawt a, Sports & Youth Services Deptt. hotute chuan Mizoram Boxing Association(MIZBA) hruaitu ni mek-te chu May 2024 ral hma ngeia Rs.nuai 26 an hmanralna Utilization Certificate leh Voucher te thehlut turin an hriattir a ni.

RTI in engnge a sawi?

ZALEN-in RTI a kawl atanga a lan danin Mizoram Boxing Association(MIZBA) hnenah boxing academy dinna tur leh boxing equipments leina atan Rs.29,00,000/- atanga 80% chu Sports & Youth Services(S&YS) Department chuan Ni 13th June 2019 khan first installment 80%, Rs.23,20,000/- an pe chhuak a. He sum hi 2019 a khatih laia MIZBA Treasurer kutah pek a ni a. Second installment Rs.2,80,000/- chu ni 10 Aug. 2023 khan MIZBA President nilai mek hnenah pek chhuah leh a ni a. 

Boxing academy atana sum pekchhuah tawh zat chu Rs.Nuai 26 niin MIZBA hian boxing academy din leh din loh hre turin sum hmanna bill leh voucher an la dawng lo niin RTI-ah Department lam chuan an chhang a ni.

MIZBA hruaitute'n sum dawn chungchang engtin nge an sawi?

MIZBA hruaitu hlui atanga thudawn danin Ramhlun Sports Complex -a Sports Council ta boxing hall chu Academy din nan Rs 3,43,758/- sengin MIZBA hian 2019 khan an chei bawl hna an tan a. Pawl leh boxing academy lam hruaitu 3 inhnaih tak taka an thih avangin hmalak a muang a, hripui (Covid-19) a len tak avangin chhunzawm theih a ni lo a. MIZBA hruaitu inthlak a nih tak avangin hruaitu hluite chuan academy dinna tur sum an hman ban Rs 19,76,242/- chu hruaitu tharte hnenah an hlan niin thudawnna chuan ZALEN a hrilh bawk.

MIZBA President ni mek chuan sum thu hla-ah pelhe a awm loh thu ZALEN a hrilh thung a, 'May thla chhungin kan inchingfel hman ang, sawifiah ngai a awm pawhin kan la sawifel ang', tiin a sawi bawk.