Indian National Congress (INC) president thar atan Mallikarjun Kharge chu thlan tlin a ni ta. Kum 80 mi Mallikarjun Kharge hian vote 7,897 a hmu a, a khingpui Shashi Tharoor chuan vote 1,071 chauh a hmu a ni. 

Vote hi tukin zing dar 10 atang khan AICC headquarters, New Delhi-ah chhiar a ni a, Mallikarjun Kharge hi hneh taka thlan tlin a ni ta a ni. Veteran Congress leader Mallikarjun Kharge hi Gandhi chungkua ni lo atanga kum eng emaw zat chhunga president post chelh thei hmasa ber a ni dawn a, Congress president lailawk Sonia Gandhi a thlak dawn a ni. 

Congress president thlan boruak hian India politics titi a luah hneh hle a, result hian mipui ngaihven a hlawh hle a ni. President atana thlan thar Kharge hian vote 9,385 atangin vote 7,897 zet a hmu a, huhang a ngah hle. 

Mapanna Mallikarjun Kharge hi July 21, 1942 khan tuna Karnataka ni ta Warwatti, Hyderabad-ah a piang a, Gulbarga, Karnataka atangin 2009 atanga 2019 inkar khan Member of Parliament (MP) a ni. February 16, 2021 khan Karnataka atang hian Rajya Sabha MP atan thlan tlin leh a ni a, Rajya Sabha-ah hian kumin October 1 thleng khan opposition leader a ni nghe nghe. India sawrkar-ah Railways Minister leh Labour and Employment Minister hnate pawh a lo chelh tawh a ni.