August 2, 2022; Zanin dar 7 bawr vel khan Lengte peng leh Sihhmui inkar Lei (bridge) bulah mi 4 chuanna, Venue car chesualin, Tlawngluiah a tla thla a, he thu ziahlai thleng hian car neitu C. Lalfakzuala @ Mafaktea (39) H/o Rebecca Lallawmzuali leh a fapa Malsawmkima (10), Chaltlang, Lily veng te chu chin hriat lohin an la awm.

ZALEN thudawn danin, C. Lalfakzuala te hi Thuampui, Aizawl a CK. Enterprise (motor rawng kahna dawr) neitute niin, vawiin lam khan an dawr thenawmte nen Daifim picnic spot ah birthday an lawm a, an haw lamah vanduaina hi an tawk a ni.

Motorah hian a neitu C. Lalfakzuala leh a fapa Malsawmkima bakah midang pahnih Lalngaihawma s/o Vanlalrimtuia leh Mano Lalrinhlua s/o R. Laltanpuia, Chaltlang Lily veng ve ve te an chuang bawk a, an chetsual dan tak chiang taka hriat theih a la nilo a, Lengpui lam atanga Lengte peng pelh thlak, Lei (brige) bulah chesualin, Lei hnuai Tlawnglui ah an tla lut a, motor a chuang mi pahnih, Lalngaihawma leh Mano Lalrinhlua te chu kawngpui ah an vakchhuak thei a, motor neitute pafa erawh he thu ziahlai thleng hian hmuh an la ni lo a, Sairang leh Sihhmui bakah, an chenna, Chaltlang Lily veng atangin mi thahnemtakte chuan chetsualna thlenna hmun hi an pankhawm nghal a ni.

Motor a chuang ve mi pahnih te chu Civil Hospital, Aizawl thlenpui an ni tawh a, an dinhmun a ngaihtuahawm loh nia hriat an ni.

Zanin khan an chuanna motor chu Tlawnglui atangin hnuhchhuah tum niin, zan lam thil te a ni tawh nen hnuhchhuah ngaihna a awm tawh lo a, naktuk lamah khawl hmanga hnuhchhuah turin ruhmanna siamfel a ni a, thudawn danin, motor chhungah C. Lalfakzuala te pafa hi an awm lo a, ruahsur vangin tui a lian a, tui a nut bawk avangin  chet ngaihna vak a awm lo a, hemi vang hian a nawlpui a zawn hna chu naktuk a chhunzawm turin ruahmanna siamfel a ni a, hetihlai hian Tlawnglui kai thenkhatah erawh tlaivar duty turin ruahmanna siam a ni.

Motor neitu C. Lalfakzuala hi Chaltlang Lily vengah a nu Rozingi hova a nupui fanaute nen a khawsa an ni a, a pa nen a chin hriat loh a awm mek, Malsawmkima, kum 10 mi hi an fapa neihchhun niin, u hmeichhia 1 leh nau hmechhia 1 a nei.