Pakistan Prime Minister hlui Imran Khan chuan Wazirabad khaw chak lama kawngzawh an buatsaih laiin silai hmanga beih a tawk a, pawikhawihtu hian a keah a kap hliam. Kum 70 mi Imran Khan hi Hospital-ah dah luh nghal a ni a, a dinhmun a ngaihtuah awm lo nia tarlan a ni. 

Silai hmetpuaktu hi police ten an man nghal a, tunge a nih erawh puanzar a la ni lo thung. Pawi khawitu hi poice hmaah a inpuang a, hetianga a chet chhan chu Imran Khan hian mipuite chu kawng dik loa a kaihhruai vang niin a sawi. Hei vang hian Imran Khan hi thah a duh a, chumi tur chuan a che chhuak ta tih a sawi a ni. 

Cricketer-turned-politician Imran Khan hi an ram Prime Minister 22-na atan August 2018 khan lakluh a ni a, mahse a lakah no-confidence motion put luh niin April 2022 khan PM atang hian ban a ni. Pakistan-a party lian ber Pakistan Tehreek-e-Insaf (PTI) dintu leh chairman ni bawk a ni a, lam tang pawh a ngah hle. 

PM atanga paihthlak a nih avang hian a lungawi lo hle a, inthlan buatsaih leh vat phutin kawng zawh a huaihawt. Vanduaina a tawh pawh hi kawng zawh a huaihawt laia thleng a ni a, container truck-a thusawi tura a ding chhuak chu silaiin an rawn kap ta a ni. PTI party chuan Imran Khan bakah hian mi dang paliin hliam an tuar tih an sawi. 
  
Khawvel ram hrang hrangah ram hruaituten beih an lo tawk fo tawh thin a, July thla mai pawh khan Japan Prime Minister hlui Shinzo Abe chu khawlaiah silaia kahhlum a ni. Pakistan Prime Minister hlui tho Benazir Bhutto pawhin kum 2007 khan vantlang inkhawmah bei a lo tawk tawh bawk a ni.