Aizawl November 7, 2022: Vawiin khan ZPM chhung inkhawm neih niin, he hunah hian ZPM Leader Lalduhoma chuan, Brig. T Sailo hmathlir tihhlawhtlin duh te awmna tur chu ZPM a nih thu a sawi. Mithar lawmluhna hun hmangtu Working President K Sapdanga chuan tun hnaiah chhan hrang hrang a avangin ZPM-ah an lo haw khawm zel a ni, a ti. 

Lalduhoma chuan, “Vawiinah mi thar duhawm tak tak kan nei hi lawmawm ka ti hle a. ZNP dinthar lehtu, engemaw avanga la khaw tang rih te pawh lo haw turin kan sawm a, Brig. T Sailo hmathlir tihhlawhtlin duhte pawh ZPM hi in awmna tur a ni, in inpuiah hian lo haw turin kan sawm vek che u a ni. Brig. T Sailo an a ngaihpawimawh em em power chungchang leh basic need tithe hi a kengkawh zeltu leh a tipuitling thei tur awmchhun chu ZPM hi a ni. Brig. T Sailo zirtirna pawma a hlawhtlin duh te chu ZPM-ah hian an awm turah kei chuan ka ngai a ni,” a ti. 

ZPM Leader chuan, “Vawiin thlengin tawngchhe tinreng nen kan chhiatna turin, dik leh diklo pawh dawn chang lova beihna kan tawk mek a, Amaherawhchu, heng hi kan tan malsawmnaah a la chang thei a ni. Davida ang khan a dawnsawn dan kan thiam chuan, kan tan malsawmna thlentu a ni mek reng a, a ni zel dawn a ni.  ZPM hi kan thang zel a, kan engin a chhun phak chin pawh a zau ta a, chutihrualin min hualtu thim pawh a zau ve zel a, heng hi kan paltlang a ngai. Min beitute beihlet hi a tul ber lo, Pathian i ngaichang ang u. Sawrkarna chang turin kan thawhrim a ngai a, kan tan tak tak a ngai, party dang aia kan thawhrim a ngai. Hei hi headquarters atanga unit thlengin i hria ang u, Pathian malsawmna dawng tlakin kan zavaiin rim takin i thawk ang u. Mi aia kan thawhrim chuan Pathianin mal a sawm ang a, kan sawrkar ngei ang tih hi ka ring tlat a ni,” a ti bawk. 

Lawmluhna thu sawitu K. Sapdanga chuan, “Tunhnaiah chhan hrang hrang avangin hmun hrang hrang atangin an lo hawkhawm zel a, mi mangangte tlankhawmna nih hi a lawmawm viau rualin, inpui nghaktute pawh thlamuanpui thama kan awm a tul. He pawl kalphung rinna avanga mite an lo tlankhawm hi a hlu lehzual a, he ZPM kalphung rinna hi kan rilru puthmang ni zel turin kan duhthusam a ni. Tin, ZPM member nih tul ti lo, pawnlam atanga min venpui tum mi thahnem tak an awm bawk; kan tana an hlutna hi kan theihnghilh hauh tur a ni lo. He kum khat la awm chhung hian, thahnemngai tak leh rim taka kan thawh chuan, Pathian malsawmna leh mipuite duhsakna kan hlawhchuak ngei ang,” a ti.