July 10, 2022; Relief camp a awm Bru chhungkaw 6,959 zinga 60% vel te chuan Tripura a an inbenbelna tur hmun an luah fel tawh tih Mizoram Bru Displaced People Forum (MBDPF) Gen, Secretary Bruno Msha chuan ZALEN a hrilh.

Bruno Msha chuan relief camp hrang hrang a awm za a 60 bawr vel te chuan inbenbelna tur in hmun an neih tawh avangin, relief camp an chhuahsan tawh tih ZALEN a hrilh a, midang za a 40 bawr vel te inbenbelna tur hmun erawh zawn mek zel a nih thu sawiin, chung mite chu relief camp ah an la awm rih niin a sawi. 

Relief camp a awm zingah Mizoram a let dil leh te pawh an awm tih sawi bawkin, an dil dan a mumal loh avangin a tluantling ta lo nia an hriat thu a sawi a. Inbengbel hmasa ten in leh lo sakna tur chak an lak nasat tawh avangin, tunhnu a inbengbel thar turte tan in sakna tur chak lak tur a vang deuh a, chu chu tuna harsatna an neih pakhat a nih thu a sawi bawk.

Relief camp hrang hrang a Bru te hi Tripura state chhung, Gomati district, Dhalai district, North Tripura district chhung, Khahamphaipara, Hamsapara, Kaskau leh Kanchanpur Sub Division hnuai Bandarina ah te an inbengbel hlawm a, hetihlai hian tun thlengin Bru voters mi 707 te chu Mizoram Electoral Roll atangin paih an ni tawh.

Kum 2020, January thla khan sawrkar laipui, Tripura sawrkar leh Bru pawl aiawhte chuan inremna an lo ziak tawh a, Bru refugee te chu an awmna tur ram ft 40X30 a zau pek tur a ni a, fixed deposit in Rs. 4,00,000 dahsak tur an nih bakah, kum hnih chhung thla tin Rs. 5,000 leh a thlawnin ration pek tur a ni. Hengte bak hamthatna dawn tur dang ruahmansak an ni bawk.