August 24, 2022; Mizoram atanga tlanchhia, Tripura bru transit camp a awm, Tripura a inbenbel thlang zui ta zing a mi 5,009 te chu Tripura electoral roll ah thun an ni tawh a, hetihlai hian Tripura electoral roll a thun tawh zawng zawngte erawh Mizoram electoral roll atangin paih an la ni lo, tun thlengin mi 1,259 Mizoram electoral roll atangin paih an ni tawh.

Mizoram Election department hotute hnen atanga ZALEN thudawn danin, tunhnai a Chief Electoral Officer (CEO) Conferene, Delhi a neih ah, CEO Tripura chuan bru voters 5,009 te chu Tripura electoral roll ah thun an ni tawh tih a report a, Mizoram Election department lam erawhin EROnet lamah corresponding deletion request an la dawng tam lo a, an dawn ang chin chin te chu Mizoram electoral atangin an delete zel thin.

Hetihlai hian Mizoram Election department in August ni 22, 2022 thleng a Mizoral electoral roll atang bru voters an paih tawh zat chu 1,259 a tling tawh a, chungte chu corresponding deletion request an dawn ang a paih te an ni.

Mizoram Election depatrment in Mizoram electoral roll atanga a paih tawh te hi Mamit district chhung, Hachhek bial atangin 791, Dampa bial atangin 48 leh Mamit bial atangin 234, an vaiin 1,074 an ni a, Kolasib district chhung, Tuirial bial atangin 79, Kolasib bial atangin 29 leh Serlui bial atangin 67, an vaiin 175, Lunglei district chhung, Thorang bial atangin 5 leh West Tuipui bial atangin 5 paih tawh an ni.