ZALEN August 21, 2025 : Congress Thalai chuan, "Chief Minister Lalduhoma'n 'Union Home Minister Amit Shah hnena ka dil anga Mizo thalai 300 Border Security Force (BSF) a lakna tur Advertisement chu vawiin khan tihchhuah a ni ta a. Mizo mipa 255 leh hmeichhia 45 lak an ni ang' tiin 18.8.2025 (Thawhtanni) khan ama facebook wall-ah thu a post a. Hei hi thudiklo hulhual niin dawt chiang tak kan CM hian a sawi a ni tih kan puang a ni," an ti.

MPYCC chuan Kum 2023 khan Ministry of Home Affairs chuan India ram pumpui tan BSF Constable 3588 lak phalna a pe a. Amaherawhchu, kum 2024 April thlaah Parliament (Lok Sabha) inthlanpui neih anih vangin hmalak chhunzawm mai theih a ni lo a. Chumi chhunzawmna chu BSF hnaruak hnawh khah mek hi a ni. Mizoram bik BSF 300 lakna tur advertisement chhuak mek pawh hi chumi tho chu a ni a (Vide MHA UN No. 45023/29/2021-PP/570 dated 17.01.2023). Mizoram rual hian Meghalaya state tan BSF post 300 advertisement a chhuak ve mek bawk a, Mizoram leh Meghalaya-a BSF lak tur hi a inzat chiah a ni, an ti.

Congress Thalai chuan, "Hetiang hi thil awmdan dik tak a nih mek avangin CM Pu Lalduhoma’n ama mimal ngen chhuah ang hiala dawt ngialngan a sawi ta mai hi Chief Minister nihna a tizahawmlo hle ah kan ngai a. Mizoram ang thoa Meghalaya state tana BSF 300 advertisement chhuah ve mek pawh hi Chief Minister sawi chhuah ve tho a ni em? tih kan zawt nghal a, Nge Meghalaya Chief Minister hian ka sawi chhuah a ti ve ang em? Chuvang chuan Mizoram mipui bumna atana thubelhchian dawllo sawi hi sim nghal turin kan hriattir a ni," an ti bawk.  

Chief Minister-in a Social Media kaltlanga a thu post-ah hian India Sipai (Armed Force) Agniveer lakna hi kalpui mek a ni bawk a. MLA Lt.Col Clement Lalhmingthanga’n a vil reng bakah, Sports Minister Lalnghinglova Hmar thahnemngaihna zarah Sport Quota atangin 12 an tlin thu a tarlan pawh hi Politics tenawm tak, hna lak chungchang tihbawrhbanna leh mipui rilru hruaisual tumnaah an ngaih thu an sawi bawk.