Aizawl: Bible Society of India, Aizawl Auxiliary chuan kum kalta 2019-2020 a an target chu vbc. 1.8 in an khum a. Kumin ah hian India rama Auxiliary zingah a titha ber an nih leh ngei an ring.

Zalen palaiin Bible Society of India, Aizawl Auxiliary thawktu te hnen atanga thu a dawn danin sawrkar kum liamta 2019-2020 a an target chu Rs. 3,11,23,000 anih laiin an sum hmuh chu Rs. 4,96,15,921 a ni a, target hi Rs. 1,84,92,921 in an khum a ni. BSI Aizawl hian nikum (2018-19) aia an hmuh tamna hi Rs. 36,42,565 a ni bawk. Bible Socity of India hian India ram hmun hrang hrang ah Auxiliary 16 an nei mek a, heng zingah hian nikum lamah pawh Aizawl Auxiliary hi a titha ber an ni a, kumin ah hian lockdown avangin Auxiliary hrang hrang te sum thawhchhuah zat hi la hriat loh mahse Aizawl Auxiliary chu sum thawkchhuak hnem ber anih leh ngei rin a ni.

Bible Society of India, Aizawl Auxiliary thawktu te chuan kumin atan Branch hrang hrang te target an la siam thei lo tih Zalen palai an hrilh a. Target siam tur hian annual meeting neih a ngai a, mahse India ram pumah inkharkhip hman a nih avangin thutkhawm hi a la koh theih loh a. Remchang hmasa berah target siam tura thutkhawm koh an tum a ni.

Tunhnaia rate hrang hrang tihsan chuan an sum hmuh kawngah harsatna a siam lo tih sawiin BSI thawktute chuan Bible Society of India in thawhlawm thawhna tur ki hrang hrang a siam Patron member, Life member, Annual member, Junior member, Bible a month, Memorial gift leh Anniversary a siam bakah thuneihna a pek angin Aizawl Auxiliary chuan Gospel a day, Bible missionery, Life donor, Patron donor te a siambelh avangin sum thawhchhuah kawngah harsatna an tawk lo mai ni lovin an target pawh an khum thei zel niin an sawi bawk.

Bible Society of India, Aizawl Auxiliary hnuaiah hian Branch 56 an awm mek a, Branch hnuaiah hian Unit engemaw zat an awm leh a ni. Bible Society of India, Aizawl Auxiliary office thin 'Bible House' chu leimin vanga luah zui theih a nih loh avangin tunah hian BSNL office thlanga sawrkarin ram a pekah 'Bible House' tur hi sak leh mek a ni. Office sak chhung hian Synod Office ah an awm hrih a ni.